Amber Ray avunja kimya kuhusu madai ya kuvishwa pete ya uchumba na mpenziwe Rapudo

Mwanasosholaiti Amber Ray amejibu madai ya kuwa alivishwa pete ya uchumba na mpenzi wake Kennedy Rapudo siku ya Jumatano.

Kupitia Instagram, Amber Ray aliwashukuru waliochukua hatua ya kumpongeza hata kabla ya kubaini iwapo ni ukweli alichumbiwa.

"Nawashukuru nyote kwa jumbe mlizonitumia ila kama kawaida wanablogu wamewachanganya kidogo. Haikuwa sherehe ya kuchumbiwa, ilikuwa ni kuposa tu  (ili wazazi wetu kufahamu kuwa tuko kwenye mahusiano) , hii ilikuwa hatua kubwa sana kwetu," mwanasosholaiti huyo alisema.

Alisema kuwa amefurahia hatua hiyo ya mahusiano yao na kuwa imekuwa jambo bora zaidi kumtendekea maishani.

Mama huyo wa mtoto mmoja alisherehekea siku hiyo na kuitaja kuwa miongoni mwa siku asizotaka kusahau maishani.

Aliwaambia watu waliodhani kuwa amevishwa pete ya uchumba kuwa bado wakati wa kupiga hatua hiyo haujafika.

"Hebu muache kutuharakisha. Tunachukua hatua za mahusiano yetu siku moja baada ya nyingine na kiukweli napenda kila kitu kinachoendelea. Kennedy Rapudo nimefurahi sana kuwa kwenye safari hii nawe," Amber Ray alisema.

Fununu zilienea kuwa Amber Ray alikuwa amevishwa pete ya uchumba baada ya dadake Ellah Ray kupakia video kwenye ukurasa wake wa Instagram na kuandika:

"Hongera dada yangu Amber Ray na Kennedy Rapudo. Mungu abariki muungano wenu. Nimepata kuongeza kaka leo," 

Aliwapongeza wapenzi hao kwa hatua hiyo kubwa ila hakufafanua zaidi kama ilikuwa sherehe ya kuchumbiwa ama ya posa. Aidha alimtakia dada yake furaha kwenye mahusiano yake na kutaka waendelee hadi hatua ya ndoa.

"Tabasamu zilizomo kwenye nyuso zenu zisididimie katika jina la Yesu. Mungu awalinde na awatangulie," alisema.

Amber na Rapudo walirudiana wiki tatu zilizopita baada ya kuachana kwa muda.