CR7 atoa hoteli yake ya kifahari kuwapa hifadhi wahanga wa zilizala Morocco

Hoteli ya Marrakech inayomilikiwa na Cristiano Ronaldo imefungua milango yake kwa wahanga wa tetemeko la ardhi nchini Morocco.

Siku ya Ijumaa tetemeko kubwa la ardhi la kipimo cha 6.8 lilipiga eneo la milima la High Atlas nchini Morocco, karibu maili 45 kutoka mji wa Marrakech.

Kufikia Jumamosi jioni, takriban watu 2000 wamekufa kutokana na tetemeko la ardhi na wengine wengi kujeruhiwa au kutoweka.

Katikati ya machafuko na janga hilo, mashirika na biashara kadhaa za Marrakech zimetoa msaada kwa wale walioathiriwa na tetemeko hilo.

Mmoja wao ni Pestana CR7 Marrakech, hoteli inayomilikiwa na nyota wa Ureno Cristiano Ronaldo. Ripoti zinaonyesha kuwa hoteli hiyo ya kifahari inatoa makazi kwa wale ambao wamepoteza makazi yao.

Marrakech ni jiji la nne kwa ukubwa nchini Morocco na kivutio maarufu cha watalii kutoka duniani kote. Hoteli ya Ronaldo iko katika wilaya ya M Avenue katika eneo la mji wa kale wa jiji hilo.

Hoteli hiyo yenye vyumba 174 inadaiwa kuwa ni sehemu ya starehe iliyoongozwa na Morocco lakini jengo hilo limebadilishwa ili kutoa hifadhi kwa wahanga wa tetemeko la ardhi.

Ishara ya Ronaldo sio pekee kutoka kwa ulimwengu wa soka kusaidia wale walioathirika. Siku ya Jumamosi timu ya taifa ya Morocco ilichangia damu kusaidia waathiriwa.

Beki wa Morocco Achraf Hakimi aliandika kwenye mtandao wa kijamii: “Tunapitia wakati mgumu kwa wananchi wenzetu wote. Ni wakati wa kusaidiana kuokoa maisha mengi iwezekanavyo. Pole zangu kwa wote waliofiwa na mpendwa wao.”