Genge lashambulia treni ya Nairobi iliyokuwa na wanafunzi 520

Shirika la Reli la Kenya mnamo Alhamisi, Julai 13, lilisitisha huduma za treni  Syokimau na Lukenya kufuatia visa viwili ambapo magaidi wasiojulikana walishambulia treni, na kuhatarisha maisha ya abiria.

Shirika hilo lilifichua mnamo Alhamisi kwamba mwendo wa saa 11:00 asubuhi, kundi la vijana waliokuwa na ghasia walivamia treni iliyokuwa na wanafunzi 520 kwenye njia ya Mukuru kwa Njenga.

Genge hilo liliirushia treni mawe na kuziba njia, na hivyo kuweka maisha ya watu waliokuwemo hatarini.

Tukio jingine lilitokea Jumatano, Julai 12, saa 12:00 usiku ambapo washambuliaji walilenga treni iliyokuwa ikielekea Lukenya.

Shirika la Reli la Kenya halikufichua ikiwa wanafunzi waliokuwemo walijeruhiwa wakati wa kisa hicho cha asubuhi.

"Tungependa kuwafahamisha wateja wetu na umma kwa ujumla kwamba tumesitisha huduma za treni kwenye njia ya Syokimau na Lukenya.

"Hii ni kutokana na hali tete ya usalama inayotokana na mashambulizi ya mara kwa mara kwenye treni zetu zinazopitia Mukuru kwa Njenga, na watu wenye ghasia ambao wanazuia njia za reli na kuipiga kwa mawe treni," taarifa hiyo ilisoma kwa sehemu.

pic.twitter.com/YeIO52UzGz

— Kenya Railways (@KenyaRailways_) July 13, 2023

"Tunaangazia matukio mawili ambapo, jana jioni, treni ya Lukenya ilivamiwa saa 6:00 usiku, na asubuhi ya leo, treni iliyokuwa na wanafunzi 520 ilishambuliwa saa 11:00. Tunataka kusisitiza kwamba usalama wa abiria wetu bado. muhimu kwetu."

Shirika la Reli la Kenya lilithibitisha kuwa taarifa rasmi itatolewa mara huduma za kawaida zitakaporejea.