Polisi wamkamata mwanamke aliyemdunga mumewe kisu hadi kufa Kisii

Maafisa wa upelelezi kutoka Kisii mnamo Jumatano walisema walimkamata mwanamke anayeshukiwa kumuua mumewe ambaye walitengana naye katika eneo la Jogoo Jumatatu usiku.

Mshukiwa, 35 alinaswa Jumanne jioni kutoka kwa nyumba ya jamaa Kayole jijini Nairobi alikokimbilia.

Mwanamke huyo anashukiwa kuvamia nyumba ya kupanga eneo la Jogoo huko Kisii Jumatatu usiku ambapo marehemu, 45, aliishi na mpenzi wake, ambaye pia ni mwanafunzi wa chuo kikuu.

Alimchoma kisu mara kadhaa shingoni na kichwani akimuacha kwenye dimbwi la damu.

Alifariki saa chache baadaye huku madaktari wakimhudumia katika Hospitali ya Kufundisha na Rufaa ya Kisii.

Kamanda wa polisi wa kituo cha polisi cha Kisii Central Amos Ambasa alisema mshukiwa atafikishwa mahakamani kujibu mashtaka ya mauaji.

"Tayari yuko njiani kuja hapa na atafikishwa mahakamani," aliambia Radiojambo Jumatano.