Kiambu: Jamaa alia kwikwi baada ya kupoteza shilingi milioni 2.7 kwa kuuziwa shamba hewa

Mwanamume mmoja kutoka kaunti ya Kiambu amebaki katika hali ya kulia na kujuta baada ya kutapeliwa shilingi milioni 2.7 katika biashara ya kuuziwa shamba.

Kwa mujibu wa ripoti hiyo ya kusikitisha iliyopeperushwa kwenye runinga ya Citizen, mwanamume huyo alihadaiwa kuuziwa shamba na baada ya kulipa kiasi hicho cha pesa, eneo la Ruiru, alitaarifiwa kwamba shamba si la mwenye alimuuzia huku ikibainika kwamba hatimiliki zote zilikuwa ghushi.

Mwanamume huyo ambaye hakutaka jina lake litajwe, alilia kwamba kipande cha ardhi cha futi 100 kwa 100 alichouzwa kilikuwa cha mtu mwingine.

Mwathiriwa alisimulia kwamba mnamo Desemba 2023, aliona shamba hilo huko Mukutha, Ruiru, ambapo alikutana na mmiliki wa ardhi anayedaiwa kuwa Robert Waihumbu Nganga.

"Nilikutana na muuzaji (Robert) katika afisi ya wakala wa ardhi katika mji wa Ruiru. Tulikamilisha mpango huo kwa sababu mwanamume huyo alikuwa amekuja na wakili, na kufanya mchakato huo kuonekana kuwa wa kweli," alisema mwathiriwa.

Katika hali ya kushangaza, alipochukua hatua za kulisafisha shamba hilo baada ya kupokea hati yake ya umiliki, alitokea mtu mwingine akidai umiliki wake.

Kupitia kwa wakili wake, alihamia kwenye sajili ya ardhi ili kuthibitisha hati hizo, ambazo ziligeuka kuwa bandia. Jina la umiliki lililingana na la mmiliki halali wa ardhi, kitambulisho na PIN ya KRA, lakini saini ilighushiwa.

"Nyaraka zote ziliandikwa na sajili ya ardhi kuwa ghushi. Lakini cha kushangaza, zote zilikuwa na mihuri ya serikali na mihuri ya mpira, isipokuwa sahihi," mwathiriwa aliongeza.

Alishangaa kwa nini wakili wa muuzaji hakuthibitisha hati kabla ya kuanzisha uuzaji. Polisi wa Juja wameanzisha uchunguzi kuhusu kisa hicho na msako wa kumtafuta mshukiwa.