Gachagua akashifu ajenda ya Ruto ya ujenzi wa nyumba za bei nafuu

Aliyekuwa Naibu Rais Rigathi Gachagua amepuuzilia mbali mpango wa ujenzi wa nyumba za bei nafuu wa serikali ya Kenya Kwanza kama kesi ya vipaumbele visivyofaa.    

Akizungumza wakati wa ibada katika kanisa la PCEA Emmanuel Matanya, Parokia ya Waguthiru katika Kaunti ya Laikipia, Gachagua alidai kuwa ushauri wake kwa Rais William Ruto kutimiza ahadi za kampeni ulipuuzwa na kupendelea ajenda ya makazi.

"Nilikuwa naambia rais, si tutimize ile ahadi tulipatania wananchi...tuwajengee barabara, tuwaunganishie stima, tuwawekee maji na tuangalie maneno ya elimu," Gachagua alisema.

"Rais anasema, wacha tufanye kwanza mambo ya affordable housing."

Naibu huyo wa rais wa zamani alikosoa mpango huo, akisema kuwa Kenya inakabiliwa na changamoto za dharura zaidi, kama vile miundombinu duni na uhaba wa maji. 

Alihoji hitaji la mpango wa nyumba, akipendekeza kuwa rasilimali zilizotengwa kwake zingeweza kutumiwa vyema kushughulikia maswala haya muhimu.

"Hapa kuna mtu hana nyumba yake? Mnataka maji ama nyumba? Mnataka barabara ama nyumba? Kila mtu anaweza kujenga nyumba yake."

Kando na kukashifu mpango wa ujenzi wa nyumba, Gachagua alimshutumu Rais Ruto kwa kufufua dhehebu lililoharamishwa la Mungiki, akidai linatumiwa kuvuruga eneo la Kati mwa Kenya.

"Rais amefufua kundi haramu ndiyo atuhangaishe," Gachagua alidai.

"Ukileta kundi hilo, watu wetu watakuchukia kuliko venye wanakuchukia saa hii."

Gachagua, ambaye amekuwa mkosoaji mkubwa wa serikali tangu kuondolewa afisini, alidokeza kutoa tangazo muhimu la kisiasa katika wiki zijazo.

"Ninasikiliza watu, na nitatoa tamko baada ya wiki mbili," alisema.