Ruto: Gachagua haelewi chochote

Katika siku ya sita na ya mwisho ya ziara yake ya kimaendeleo ya Magharibi mwa Kenya, Rais William Ruto alikuwa katika kaunti za Bungoma na Busia ambapo uhusiano wake uliodorora na aliyekuwa naibu wake Rigathi Gachagua uliendelea kucheza.

Mkuu wa Nchi alitoa sababu nyingine kwa nini ilimbidi kumtimua mwanamume ambaye alikuwa mgombea mwenza wake kwenye kura, kwa ahadi ya kuboresha maisha ya Wakenya.

“Yeye (Gachagua) haelewi chochote kuhusu mipango ya Jamhuri ya Kenya. Haelewi chochote kuhusu UHC, hana habari kuhusu makazi, hana ufahamu kuhusu kilimo, hana fununu kuhusu vijana wetu," Ruto alisema.

 “Alafu anasimama pale na anataka kutupea lecture. Wewe unatupea lecture ya ujinga utupeleke wapi? Bure Kabisa, wale watu wa chuki, wale wa migawanyiko, wale wa mitego, wale wa mashares, hawana nafasi ya kuhubiri chuki katika taifa letu la Kenya.”

Rais alitoa wito kwa wakosoaji wake badala yake watoe suluhu mbadala kwa matatizo yanayosumbua taifa kinyume na kuwa katika matusi kila mara.

"Hakuna jamii nchini Kenya ambayo itatengwa kwa sababu yoyote. Hakuna eneo nchini Kenya ambalo halitashiriki katika maendeleo ya taifa letu. Na hiyo ndiyo dhamira yangu. Na sitakengeushwa, sitakatishwa tamaa na sitadhulumiwa na hakuna mtu atakayesimama njiani,” alisema.

Rais Ruto zaidi alionyesha matumaini kwamba mgombeaji wa Kenya wa Uenyekiti wa Tume ya Umoja wa Afrika (AUC) Raila Odinga atanyakua kiti hicho.