Duale: Kuwanyima Wasomali haki zao ni kinyume na Katiba

Katibu katika Wizara ya Mazingira, Mabadiliko ya Tabianchi na Misitu, Aden Duale, amesema kila raia wa Kenya ana haki ya kikatiba ya kusajiliwa na stakabadhi za utambulisho. Duale alitoa mfano wa Ibara ya 12 ya Katiba.

“Haki hii si mapendeleo bali ni haki ya kimsingi ambayo inatumika kwa raia wote, wakiwemo wazalendo wa Kaskazini mwa Kenya,” Duale alisema.

“Kwa hiyo, ni jambo lisilokubalika kwamba jamii za ukanda huu zinaendelea kufanyiwa uhakiki holela na kuchujwa wasifu wa kikabila kabla ya kupewa vyeti vya kuzaliwa na vitambulisho vya taifa,” aliongeza.

Waziri huyo alisema vitendo hivyo sio tu kinyume cha katiba bali pia ni ubaguzi wa wazi unaodhoofisha misingi ya usawa na uraia ambayo taifa letu linasimamia.

“Sheria ya Uraia na Uhamiaji ya Kenya, Sura ya 170, inaimarisha zaidi haki hii katika Kifungu cha 22, ikisema kwa uwazi kwamba kila raia ana haki ya kuandikishwa na hati za utambulisho, ikiwa ni pamoja na vyeti vya kuzaliwa, vitambulisho vya taifa na pasipoti,” alisema.

"Sheria hairuhusu utoaji wa kuchagua, wala haikubaliani na vikwazo vinavyokiuka haki za Mkenya yeyote kwa misingi ya kabila au jiografia," akaongeza.

Duale alisema wanaopinga agizo la Rais la kuhakikisha upatikanaji sawa wa hati za vitambulisho ni lazima wakumbushwe kuwa kuwanyima raia stakabadhi zao halali ni dharau kwa Katiba na dhuluma ambayo haifai kuvumiliwa.

"Serikali ina wajibu wa kushikilia sheria na kuondoa ubaguzi wowote wa kitaasisi unaowazuia Wakenya kufurahia haki zao kamili kama raia. Hili si suala la mazungumzo. Ni suala la haki, uhalali na umoja wa kitaifa."