NOW ON AIR

Gachagua Amkashifu Raila kwa Kuwatumia Watu wa Magharibi Kujinufaisha

Bungoma siku ya Ijumaa, Julai 4, 2025, Gachagua alihimiza eneo hilo kubadili mwelekeo wa kisiasa huku akipuuza madai ya Raila kwamba uongozi wa jamii ya Mulembe utatokea kupitia ziwa.

na Tony Mballa

Habari04 July 2025 - 21:52

Muhtasari

Kauli za Gachagua zinajiri baada ya Kalonzo Musyoka kuwahakikishia Wakenya kuwa uchaguzi mkuu wa 2027 hautaibwa, akisisitiza kuwa muungano wa upinzani utaweka mikakati ya kuhakikisha uchaguzi huo unakuwa huru na wa haki.
Akizungumza katika mkutano huo huo, kiongozi wa chama cha Wiper alisema kuwa wizi wa kura hautatokea tena katika uchaguzi ujao wa 2027.

Naibu Rais wa zamani Rigathi Gachagua amemshutumu Raila Odinga kwa kuwatumia watu wa eneo la Magharibi mwa nchi, hasa jamii ya Waluhya (taifa la Mulembe), kwa manufaa yake ya kisiasa.

Akizungumza katika siku ya pili ya ziara ya upinzani katika Kaunti ya Bungoma siku ya Ijumaa, Julai 4, 2025, Gachagua alihimiza eneo hilo kubadili mwelekeo wa kisiasa huku akipuuza madai ya Raila kwamba uongozi wa jamii ya Mulembe utatokea kupitia ziwa.

Kiongozi wa Chama cha ODM, Raila, amewahi kutumia kauli hiyo kuishawishi jamii hiyo, hasa eneo lenye idadi kubwa la Waluhya.

“Raila amewatumia na kuwadhalilisha watu wa Magharibi. Mmekuwa mkimpigia kura katika kila uchaguzi, halafu yeye anauza kura zenu,” Gachagua aliwaambia wakazi katika mkutano uliofanyika Kimilili.

“Raila amekuwa akiwaambia kwamba Eliya Masinde alisema uongozi utatoka kupitia ziwa. Mlijaribu hiyo njia na haikufanikiwa. Wacha niwaambie, uongozi wenu utatoka Mlima Kenya,” aliongeza.

Gachagua pia aliwahimiza watu wa Magharibi kuunga mkono Mlima Kenya na uongozi wake.

Alitoa mfano wa mafanikio yaliyopatikana wakati Mwai Kibaki na Kijana Wamalwa walipounda serikali mwaka 2002 kama Rais na Makamu wa Rais, mtawalia.

“Ukitazama vizuri, wakati Wamalwa na Kibaki walishirikiana, mlipata uongozi. Baada ya kifo cha Wamalwa, Kibaki alimteua Moody Awori kuwa Makamu wa Rais. Nawaomba mkubali tushirikiane na kutembea pamoja katika safari hii,” alihimiza.

Kauli za Gachagua zinajiri baada ya Kalonzo Musyoka kuwahakikishia Wakenya kuwa uchaguzi mkuu wa 2027 hautaibwa, akisisitiza kuwa muungano wa upinzani utaweka mikakati ya kuhakikisha uchaguzi huo unakuwa huru na wa haki.

Akizungumza katika mkutano huo huo, kiongozi wa chama cha Wiper alisema kuwa wizi wa kura hautatokea tena katika uchaguzi ujao wa 2027.

“Wakenya wamechoka na kura zao kuibwa kila wakati. Nawatangazia watu wa Bungoma kwamba uchaguzi ujao hautaibwa tena. Mimi si Raila, anayesema kila mara kwamba kura zimeibwa kwake,” alisema Kalonzo.

Viongozi wa chama cha Wiper walieleza kuwa watahusisha vijana wa taifa ili kuhakikisha uchaguzi unakuwa huru na wa haki.

“Tutaweka kizazi cha Gen Z katika kila kituo cha kupigia kura kati ya vituo 50,000, na wao watatoa matokeo papo hapo. Hatutahitaji kungoja Chebukati katika Bomas. Kipindi cha wizi wa kura kimeisha. Sasa tunasema hayo ni mambo ya zamani,” aliongeza.