Mwanamume aliyefika kwenye Jumba la Windsor akiwa amejihami kwa upinde na kumwambia afisa wa ulinzi "Niko hapa kumuua Malkia" amekiri shtaka chini ya Sheria ya Uhaini. Jaswant Singh Chail, kutoka Hampshire, alikamatwa Siku ya Krismasi 2021, wakati Malkia Elizabeth alikuwa akiishi kasri la Windsor kwa sababu ya janga la Covid.
Akiwa Old Bailey hapo awali, Chail, 21, alikiri mashtaka matatu. Yeye ndiye mtu wa kwanza nchini Uingereza kuhukumiwa kwa uhaini tangu 1981.
Chail, kutoka North Baddesley, karibu na Southampton, pia alikiri kutoa vitisho vya kuua na kumiliki silaha iliyosheheni kwenye ngome hiyo.
Kwa sasa yuko katika Hospitali ya Broadmoor, ambako alifikishwa mahakamani kupitia video.
Alionekana na afisa wa ulinzi wa kifalme katika sehemu ya kibinafsi ya uwanja wa ngome baada ya 08:10 GMT mnamo 25 Desemba 2021.
Afisa huyo alikuwa kwenye lango, kuelekea kwenye vyumba vya kibinafsi vya Malkia. Chail alikuwa amepanda ndani ya uwanja kwa kutumia ngazi ya kamba ya nailoni, na tayari alikuwa hapo kwa muda wa saa mbili. Alikuwa amevaa kofia na barakoa. Afisa alimfuata na kumuuliza: "Asubuhi, naweza kusaidia, mwenzangu?" Chail alijibu: "Niko hapa kumuua Malkia."
'Samahani' Afisa wa ulinzi mara moja akamwambia Chail aangushe upinde, apige magoti na aweke mikono kichwani. Chail alitii na kisha akasema tena: "Niko hapa kumuua Malkia." Upinde huo ulipatikana ukiwa na boliti na kitu cha usalama kilikuwa kimezimwa.
Chail pia alikuwa amebeba karatasi iliyoandikwa kwa mkono, iliyokuwa inasomeka: "Tafadhali usinivue nguo, viatu na glovu, barakoa n.k,.
"Katika video iliyotumwa kwenye mtandao wa Snapchat dakika chache kabla hajaingia kwenye kasri hilo, Chail alisema: "Samahani, samahani kwa nilichofanya na nitakachofanya. Nitajaribu kumuua Elizabeth, Malkia wa Familia ya Kifalme. "Hili ni kisasi kwa wale waliokufa katika mauaji ya Jallianwala Bagh ya 1919. Pia ni kulipiza kisasi kwa wale ambao wameuawa, kudhalilishwa na kubaguliwa kwa sababu ya rangi zao."
