•Kasisi, Nuumo Borketey Laweh Tsuru XXXIII, alimuoa katika sherehe ya kitamaduni iliyofanyika Jumamosi.
•Wakosoaji wametoa wito kwa mamlaka kuvunja ndoa hiyo na kumchunguza Bw Tsuru.
Kasisi wa kitamaduni aliye na ushawishi mkubwa mwenye umri wa miaka 63 amezua ghadhabu nchini Ghana kwa kuoa msichana wa miaka 12.
Kasisi, Nuumo Borketey Laweh Tsuru XXXIII, alimuoa katika sherehe ya kitamaduni iliyofanyika Jumamosi.
Katika hali ya kukosolewa, viongozi wa jamii wamesema watu hawaelewi mila na desturi zao.
Umri wa chini wa kisheria wa kuoa nchini Ghana ni miaka 18 na kutokea kwa ndoa za utotoni kumepungua, lakini inaendelea kutokea.
Kulingana na shirika lisilo la kiserikali linalofanya kampeni ya kimataifa la Girls Not Brides, asilimia 19 ya wasichana nchini huolewa kabla ya kufikisha miaka 18 na asilimia 5 huolewa kabla ya kutimiza miaka 15.
Video na picha za tukio hilo la Jumamosi ambalo lilihudhuriwa na makumi ya wanajamii zimesambazwa sana kwenye mitandao ya kijamii, na hivyo kuzua gumzo miongoni mwa Waathirika wengi.
Wakati wa sherehe hiyo, wanawake waliokuwa wakizungumza kwa lugha ya wenyeji ya Ga walimwambia msichana avae mavazi ya kumvutia mumewe.
Pia wanaweza kusikika wakimshauri kuwa tayari kwa majukumu ya mke na kutumia manukato waliyompa ili kuongeza hamu yake ya kimapenzi kwa mumewe.
Kauli hizo zilichochea hasira, kwani zimeonekana kumaanisha kuwa ndoa hiyo haikuwa ya sherehe tu.
Wakosoaji wametoa wito kwa mamlaka kuvunja ndoa hiyo na kumchunguza Bw Tsuru.
Viongozi wa jamii ya wenyeji wa Nungua, ambayo msichana na kasisi ni washiriki, wamelaani upinzani wa umma kwa ndoa hiyo, wakisema ukosoaji huo "unatokana na hatua ya ujinga".
Nii Bortey Kofi Frankwa II, kiongozi wa jamii ya eneo hilo, alisema Jumapili kwamba jukumu la msichana kama mke wa kasisi ni "mila na desturi pekee".
Aliongeza kuwa msichana huyo alianza ibada ya kuwa mke wa padri miaka sita iliyopita, lakini mchakato huo haukuingilia elimu yake.
Msichana huyo anatarajiwa kufanyiwa sherehe ya pili ya kitamaduni ili kumtakasa kwa ajili ya jukumu lake jipya la kuwa mke wa kuhani mkuu. Sherehe hiyo pia itamtayarisha kwa majukumu ya ndoa kama vile kuzaa, vyombo vya habari vya ndani viliripoti.