• Kiongozi wao, mwanasiasa wa Kongo anayeishi Marekani Christian Malanga, aliuawa na vikosi vya usalama.
Image: BBC
Mahakama ya kijeshi katika Jamhuri ya Kidemokrasia ya Kongo (DRC) imewahukumu kifo watu 37, wakiwemo raia watatu wa Marekani, kwa tuhuma za kushiriki katika mapinduzi yaliyofeli mwezi Mei.
"Mahakama inatoa hukumu kali zaidi: hukumu ya kifo kwa chama cha wahalifu, hukumu ya kifo kwa shambulio, adhabu ya kifo kwa ugaidi," rais wa mahakama hiyo, Freddy Ehume, alisema katika hukumu iliyosomwa kwenye televisheni ya moja kwa moja siku ya Ijumaa.
Washtakiwa - ambao pia ni pamoja na Muingereza, Mbelgiji na Mkanada - wana siku tano za kukata rufaa dhidi ya hukumu hiyo.
Watu 14 waliachiliwa huru katika kesi hiyo iliyofunguliwa mwezi Juni.
Richard Bondo, wakili aliyewatetea wageni hao sita, aliliambia shirika la habari la Associated Press kuwa anapinga iwapo adhabu ya kifo inaweza kutolewa kwa sasa DRC licha ya kurejeshwa kazini mwaka huu na kusema wateja wake hawakuwa na wakalimani wa kutosha wakati wa uchunguzi wa kesi hiyo.
"Tutapinga uamuzi huu wa kukata rufaa," Bondo alisema.
Wakati wa jaribio la mapinduzi, maafisa wa kijeshi walisema watu waliokuwa na silaha walikalia ofisi ya rais kwa muda mfupi katika mji mkuu wa Kinshasa mnamo Mei 19.
Kiongozi wao, mwanasiasa wa Kongo anayeishi Marekani Christian Malanga, aliuawa na vikosi vya usalama, na walinzi wawili pia waliuawa katika pambalo hilo la kushindwa kutwaa utawala wa nchi.
Malanga, ambaye alijiita "Rais wa Zaire Mpya", alikuwa mfanyabiashara tajiri, mwanasiasa na nahodha wa wakati mmoja wa kijeshi katika jeshi la Kongo.
Alishiriki uchaguzi wa bunge mwaka 2011 lakini alikamatwa na kuwekwa kizuizini kwa wiki kadhaa chini ya Rais wa zamani Joseph Kabila.
Alipoachiliwa, Malanga alikwenda Marekani, ambako alianzisha chama cha upinzani cha United Congolese Party (UCP).
Kwa miaka mingi, alifanya kampeni ya uhuru wa kidini barani Afrika na akaongoza mipango ya mafunzo ya kupinga ufisadi kwa vijana wa Kiafrika huko Ulaya.
Rais Felix Tshisekedi aliapishwa kwa muhula wa pili mwezi Januari baada ya uchaguzi ambao ulikumbwa na masuala ya vifaa, kasoro na ghasia.
Afrika Magharibi na Kati zimekumbwa na mfululizo wa mapinduzi katika miaka michache iliyopita.