Mkuu wa zamani wa mauzo katika NYS afungwa jela miaka 7

Mkuu huyo wa zamani pia amefungwa miaka mingine 5 kwa kuvunja uaminifu kama mfanyakazi wa umma

na Brandon Asiema

Mahakama06 November 2024 - 12:54

Muhtasari

Hendrick Nyongesa pamoja na Samuel Wachenje wamehukumiwa vifungo tofauti tofauti na jaji Wandia Nyamu.
Washukiwa hao walipatikana na mashtaka waliyoyatekeleza kati ya Desemba mosi na 2014 na Juni 5 2015 katika ofisi kuu za NYS jijini Nairobi

Aliyekuwa mkuu wa mauzo katika huduma ya vijana kwa taifa NYS Hendrick Nyongesa amehukumiwa kifungo cha miaka saba jela baada ya kupatikana na hatia ya kughushi stakabadhi kinyume na sheria kifungu cha 347(a) cha katiba kilichosomwa kwa pamoja na kifungu cha 349 cha makosa ya adhabu.

Kesi dhidi ya Nyongesa iliwasilishwa mahakamani na ofisi ya mwendeshaji wa amshtaka ya umma ODPP baada ya kudaiwa kutekeleza mashtaka aliyosomewa mnamo Desemba mosi mwaka wa 2014.

Mahakama ilielezwa kuwa Nyongesa pamoja na washukiwa wengine ambao hawakuwa mbele ya mahakama hiyo wakati wa kuhukumiwa, walighushi stakabadhi kwa madhumuni ya udanganyifu.

Nyongesa alipatikana na hatia ya udanganyifu wa kughushi stakabadhi kutoka kwa wizara ya kazi ya umma ya kusambaza bidhaa kwa huduma ya vijana klwa taifa NYS.

Vile vile mshukiwa huyo pia amehukumiwa kufungo kingine cha miaka mitano kwa uvunjaji wa uaminifu kama mfanyakazi wa serikali katika huduma ya umma.

Akitoa hukumu hiyo, jaji Wandia Nyamu pia amemhukumu aliyekuwa mkurugenzi wa fedha wa NYS Samuel Wachenje kifungo cha miaka 5 jela bila chaguo la kulipa faini.