Mshukiwa wa 5 wa utekaji nyara na ulawiti wa mwanablogu jijini Mombasa ashtakiwa

Mshukiwa mwingine wa kisa ambapo mwanablogu kutoka mkoa wa Pwani alitekwa nyara na kulawitiwa amefikishwa mbele ya hakimu Robert Mbogo katika mahakama ya Shanzu jijini Mombasa na kukana madai dhidi yake.

Mshukiwa huyo alikamatwa katika eneo la Lunga Lunga karibu na mpaka wa Kenya na Tanzania baada ya uchunguzi wa maafisa wa usalama kufanywa.

Mshukiwa amesomewa mashtaka manne yanayohusiana na ukatili uliofanyiwa mwanablogu aliyeathirika ikiwemo shtaka la kupanga njama ya kutenda uhalifu na utekaji nyara akiwa na nia ya kumzuilia mwathiriwa.

Katika ushahidi uliowasilishwa mahakamani, upande wa mashtaka umesema kwamba mshukiwa huyo alishirikiana na washukiwa wengine wanne katika kumteka nyara mwanablogu.

Mbali na kuhusika katika kitendo cha utekaji nyara, hakimu Robert Mbogo alielezwa kuwa mshukiwa alimvamia mwathiriwa kwa kumpiga mateke na ngumi kitendo ambacho kilisababisha majeraha kwa mwanablogu ambaye alitekwa nyara.

Akiwa mbele ya mahakama ya Shanzu, mshukiwa alikana madai aliyosomewa na hakimu kuamuru kuzuziliwa kwake katika rumande ya Shimo La Tewa akisubiri kufanya maombi ya dhamana mnamo Ijumaa Novemba 15.

Washukiwa wa kwanza wane walifikishwa mahakamani humo wiki sita zilizopita na kushtakiwa kwa hatia ya utekaji nyara na kulawiti mwanablogu.

Washukiwa wote watano ambao wamefikishwa mahakamani wakiwemo wanawake wawili wlikana mashtaka dhidi yao.