Mkimbizi wa Sudan ,32, na mwanawe ,8, wajiunga na shule moja ya msingi Eldoret

Baadhi ya wanaume huona aibu kujiandikisha shuleni na kukaa katika darasa lililojaa watoto.Wanaona ni jambo lisilo la kiume.

Lakini  sio mkimbizi mmoja kutoka Sudan Kusini mwenye umri wa miaka 32 na mtoto wake wa kiume mwenye umri wa miaka minane ambao wamejiandikisha katika Shule ya Msingi ya Sosiani huko Eldoret.

Siku yao ya kwanza shuleni ilikuwa Jumanne.

Elimu ya mkimbizi Chol Majuk ilikatizwa na kufungwa kwa shule kwa muda mrefu nchini Uganda kutokana na janga la Covid-19.

Hii ilimfanya kuhamisha familia yake hadi Kenya na kuamua kujiunga na shule pamoja na mwanawe, Ajuo.

Majuk amejiunga na darasa la 3, huku mtoto wake akiandikishwa PP1 chini ya mtaala wa CBC.

Mkimbizi huyo kutoka Sudan Kusini alikuwa akiishi Uganda hadi mwishoni mwa mwaka jana wakati familia yake ilipohamia Eldoret.

Baada ya kuruhusiwa kuandikishwa, Majuk alienda sokoni kutafuta sare zake na za mtoto wake.

Majuk alisoma hadi darasa la 4 nchini Uganda. Shule zilifungwa kwa zaidi ya miaka miwili kwa sababu ya Covid-19. Alisema hali hiyo ilimfanya kuacha shule na kuhamia Kenya.

Majuk alisema amekuwa akikabiliwa na matatizo ya mawasiliano akiwa Eldoret. Aliamua kuzuru shule ya Sosiani ili kujua kama angeweza  kujifunza lugha na hisabati huku wakizoea maisha ya nchini Kenya.

Mwalimu mkuu Nicholas Kosgey alithibitisha kuwa wamekubali kuwasajili wawili hao ili waweze kuendelea na masomo. 

"Kama shule, hatukuona shida kuwapa nafasi ya kupata elimu wanavyotaka," alisema.

Kosgey alisema kuwa walitaka kumsajili Majuk katika darasa la 7 kwa sababu alijifunza kwa muda mfupi nchini Uganda lakini alikataa akisema anataka kuanza upya chini ya mpango wa CBC.

Wakati gazeti la The Star lilipotembelea shule hiyo, Majuk alikuwa darasani kwake na wanafunzi wengine na alionekana mwenye furaha.

“Hatuna kikomo cha umri kwa mtu kujiunga na shule na kwa kuwa yuko tayari kusoma, tutamkaribisha yeye na mwanawe kwa furaha ili wajifunze kama wengine." Mwalimu mkuu alisema.

Alisema watamshughulikia kama mzazi na pia kama mwanafunzi.

"Tutatumia njia zote zinazowezekana kumuunga mkono ili aweze kuzoea mfumo wetu na pia ataweza kuwasiliana kwa ufasaha," Kosgey alisema.

"Hadi sasa baba na mwana wana furaha sana na walimu wetu wote wamekubali kuwasaidia kama wanafunzi wengine," alisema.

Kosgey alisema chini ya CBC, kazi nyingi ni za vitendo na itakuwa rahisi kwa Majuk kuizoea na kuendelea  na masomo kama mtoto wake mdogo.

Majuk bado hawezi kuwasiliana na angeweza kusimulia hadithi tu kupitia mkalimani. Shule hiyo ina wakimbizi wengine kadhaa wa Sudan na mmoja wao alisaidia kumtafsiria Majuk.

“Nahitaji maisha mazuri na ndiyo maana nina hamu ya kupata elimu hapa. Ninataka kujifunza lugha kama Kiswahili ambazo ni za kawaida hapa Kenya, na kisha hisabati," Majuk alisema kupitia mkalimani.

Alisema yuko tayari kufanya kazi na wanafunzi wengine shuleni hapo ndiposa afanye vyema katika mawasiliano na pia kufaulu katika elimu. 

Alisema hana  shida kwenda shuleni na mtoto wake mdogo kwasababu Mungu anaweza kuwawezesha wote wawili kufanikiwa kimaisha.

Alisema alijua kuhusu Sosiani kupitia wanafunzi wengine wa Sudan ambao pia wanaishi Eldoret.

Shule hiyo imeandikisha wanafunzi wengine 115 kutoka Sudan Kusini wanaoishi Eldoret.

Majuk anasema familia yake inaungwa mkono na jamaa na watu wengine wenye mapenzi mema ambao pia waliunga mkono wazo lake la kujiunga na shule. Ameoa na Ajuong Chol ni mtoto wake wa pekee.

Mkewe aliamua kubaki nyumbani lakini anamuunga mkono mumewe na mwanawe wanapoenda shuleni Sosiani kila siku.

"Mke wangu anafurahi sana sisi kujiunga na shule na anatuunga mkono sana," Majuk alisema.

Shule ya Msingi ya Sosiani iko kwenye barabara ya Kisumu takriban kilomita mbili kutoka CBC ya Eldoret.

Majuk na mwanawe wanasafiri kutoka eneo la Elgon View takriban kilomita mbili hadi shuleni na kisha kurejea jioni.Waliojiandikisha ni 1,493.