Uwaniaji wa Nick Mwendwa wamulikwa na waziri wa michezo.

Huenda doa limeingia katika uwaniaji wa Doris Petra na mgombea mwenza Nick Mwendwa kuwania kiti cha urais katika shirikisho la soka nchini FKF kwenye uchaguzi utakaoandaliwa Disemba 7 mwaka huu.

Mwendwa na Petra wamekuwa uongozini kwenye shirikisho hilo kama rais na naibu mtawalia kwa zaidi ya miaka minane tangu kuchaguliwa kwao wakihudumu mihula miwili. Mara hii tena, Nick Mwedwa analenga kusalia katika nafasi ya pili ya juu zaidi katika FKF akilenga unaibu wa urais chini ya Doris Petra anayewania urais. Hii ndio tuseme ni nipe nikupe ya kubadilishana wadhfa tu.

Saa zinazidi kuyoyoma na siku zinakwenda kasi ikisalia takribani mwezi mmoja kufikia uchaguzi wa FKF utakaondaliwa katika majimbo 48 (jimbo la Nairobi limegawanywa uwili) kote nchini unaotazamiwa sana na washikadau wa soka nchini. Wagombea wanazidi kushawishi wajumbe na vilabu kuwachagua wakiahidi mazuri na marekebisho katika sekta ya soka nchini ikiwa watachaguliwa kuongoza sekta hiyo yenye ufuasi mkubwa zaidi.

Kwa mujibu wa katiba ya shirikisho la soka nchini ya mwaka 2017 kifungu cha 37(e) katiba inasema kuwa muhila wa rais wa FKF na kamati kuu ya kitaifa ni miaka mine na mamlaka yao yataanza rasmi baada ya kukamilika kwa mkutano mkuu wa uchaguzi wa FKF. Katika kifungu hicho ibara ya (f) katiba hiyo inatoa mwelekeo kuwa wanachama wote waliochaguliwa watahudumu kwa muda usiozidi mihula miwili ikimaanisha kuwa mwanachama anaweza kuchaguliwa tena katika nafasi nyingine na itahesabika kuwa muhula mpya katika ofisi atakayochaguliwa.

Kutokana na kifungo hicho cha 37(f), Nick Mwendwa na Doris Petra wanapata fursa ya kuingia uchaguzini na kuomba fursa ya kuchaguliwa tena kwa wadhfa tofauti waliokuwa wakihudumu kabla. Ila, huenda maji yakazidi unga raundi hii baada ya waziri wa michezo Kipchumba Murkomen kutilia shaka uwaniaji wa Petra na Mwendwa.

Awali bodi ya uchaguzi ya FKF iliyoteuliwa miezi michache iliyopita iliwaidhinisha wagombea tisa kuwania urais wa FKF ikiwemo nibu rais wa sasa Doris Petra na mgombea mwenza wake ambaye ndiye rais anayeondoka Nick Mwendwa.

Akiwa mbele ya kamati ya michezo na utamaduni ya bunge la kitaifa mnamo Jumanne 5, waziri Kipchumba Murkomen alitilia shaka hatua ya bodi ya uchaguzi wa FKF kuidhinisha Nick Mwendwa kushiriki uchaguzi wa FKF kama mgombea mwenza wa Petra.

Kulingana na waziri Murkomen, Nick Mwendwa amehudumu mihula miwili tayari na kwa mujibu wa sheria rais huyo anayeondoka hastahili kuwania tena unaibu rais wa FKF.

Murkomen ameitaka kamati hiyo ya bunge ya michezo na utamaduni kuwajibisha bodi ya michezo ya FKF inayoongozwa na Hesborn Owilla kama mwenyekiti na Merceline Sande kama katibu mkuu  kutoa maelezo zaidi ya jinsi Nick Mwendwa aliidhinishwa kuwania nafasi hiyo.

Aidha waziri Murkomen alijitenga na kutumia nguvu chini ya ofisi yake kubandua bodi ya uchaguzi wa FKF akisema hiyo ni hatua ya mwisho zaidi ikiwa hakuna kingine ambacho kitatekelezwa na washikadau husika kuhusiana na kuidhinishwa kwa Mwendwa.

“Uamuzi wa waziri kuvunja timu yoyote ambayo imeanzishwa kinyume na sheria upo, lakini tusiende mkondo huo, ni hatua ya mwisho. Naomba tufanye kazi pamoja ili kupata mbinu mwafaka ya kuhakikisha uchaguzi wa huru na haki.”  Alisema Murkomen.

Uchaguzi wa FKF huandaliwa kwa awamu tatu. Awamu ya kwanza hufanyika katika kaunti kisha katika kitaifa na kukamilika katika kaunti ndogo kote nchini.