Fahamu kuhusu 'Football Remembers'

Bila shaka lazima umeona jezi za timu zinazoshiriki ligi kuu nchini Uingereza zikiwa na umbo la nambari nane yenye rangi ya nyekundu kifuani. Umbo hilo ama niseme ua hilo linaitwa ‘Poppy’. ‘Poppy’ ni ishara ya ukumbusho na matumaini katika mpira wa miguu ambayo inavaliwa kuwakumbuka watu waliokufa vitani.

‘Poppy’ pia,  kwa wapenzi wa soka wameiona ikiwekwa uwanjani kabla ya mechi kung’oa nanga, kikosi cha jeshi la Uingereza kikipiga tarumbeta sawia wakiwa wamebeba shada la maua.

Naam, kila msimu ligi ya primia, chama cha kandanda(FA), ligi ya soka kwa ushirikiano na baraza la Uingereza ambalo ni shirika linaloangazia utamaduni na elimu ya kimataifa nchini humo hushirikiana kuadhimisha matukio muhimu yaliyotukia wakati wa vita vya kwanza vya dunia vya mwaka 1914 tukio la msingi likiwa kumbukumbu ya mechi ya maridhiano  maarufu kama ‘the 1914 Christmas Truce football match’.

Maadhimisho hayo ya Football Remembers yaliasisiwa mwaka wa 2014 baada ya washiriki mbali mbali kuanzisha elimu  kuhusu matukio ya vita vya kwanza vya dunia katika zaidi za shule na vituo vya mafunzo elfu thelathini katika nchini ya Uingereza. Sababu kuu ya kuanzishwa elimu hiyo, ilikuwa kuwahamasisha kizazi cha sasa na kijacho kuhusu umuhimu wa kandanda katika juhudi za kuleta amani wakipigia mfano uelewano ulioafikiwa baina ya maadui wakati wa vita hivyo.

Kwa mujibu wa elimu inayotolewa kwa watoto wa Uingereza kuhusu vita vya dunia vya kwanza, kupitia elimu hiyo, rasilimali zinatolewa kwa wanafunzi ili kuwasaidia kuelewa zaidi.

Katika msimu huu wa 2024/2025, maadhimisho ya Football Remembers yalifanyika Jumapili Novemba 10, vilabu mbali mbali vikiadhimisha siku hiyo kwa kukumbuka wanajeshi mbali mbali na wachezaji wa soka waliofariki katika ukatili wa vita hivyo.

Katika mechi ya Jumapili, ya Chelsea dhidi ya Arsenal ugani Stamford Bridge ambayo ilikamilika kwa kufungana bao moja kwa moja, kabla ya mechi, kulikuwepo na kimya cha sekunde kadhaa ili kuwakumbuka binadamu walioaga dunia kupitia migorogoro mbali mbali kote duniani.

Dunia imeshuhudia migorogoro na vita ambavyo maelfu ya watuwameuliwa  ikiwemo vita vinavyoendelea katika ukanda wa mashariki ya kati ikihusisha taifa la Israel na wanamgambo wa Hezbollah katika eneo la Gaza vita ambavyo pia Lebanon imejipata ndani. Vile vile vita kati ya Ukraine na Russia bila kusahau vita vya wenyewe kwa wenyewe nchini Sudan.

Akizungumza kabla ya mechi hiyo nahodha wa Chelsea Reece James alisema kuwa maadhimisho yao msimu huu katika klabu ya Chelsea kwa timu zote za kiume na kike zililenga kuisadia jeshi la kifalme la Uingereza katika kupokea msaada wa kuwaisaidia wale ambao wameishi na makovu ya vita.

Kauli mbiu ya jeshi la Kifalme ya Uingereza ya mwaka huu ilikuwa kwamba mchango wa msamaria mwema unaweza kufanya mambo ambayo vifaa vya kijeshi haviwezi kufanya.

Katika klabu ya Manchester United, timu hiyo iliadhimisha siku ya Football Remembers kwa kukumbuka wachezaji  wa zamani wa klabu hiyo waliopoteza maisha yao kupitia makovu ya vita.

Katika makumbusho ya Manchester United ndani ya Old Trafford, klabu hiyo ilikumbuka wachezaji wake wa zamani ikiwemo Gilbert Godsmark aliyekuwa dereva katika jeshi na ambaye aliaga katika vita vya Boer akihudumia jeshi la Newton Heath.

Kwenye makumbusho hayo ya Manchester United, baadhi ya wachezaji waliowahi kuichezea klabu hiyo kisha wakaaga kutokana na vita vya kwanza vya dunia walikumbukwa pia. Mchezaji Arthur Beadsworth ambaye alichezea Man United pindi tu baada ya kubalishwa jina na kuwa Manchester United katika msimu wa 1902/03 alikumbukwa pia. Arthur Beadsworth alikuwa sajenti katika kikosi cha saba cha jeshi la Leicestershire.

Wengine ni Thomas Cliffford, wakikosi cha sita na saba cha jeshi la Battalion Royal Scots Fusiliers, Benard Donaghey aliyechezea Man United katika msimu wa 1905/06, George Elmore aliyechezea klabu hiyo mwaka wa 1902, Hugh S. Kerr(1904), Harry Levis(1913/14), Oscar H.S Linkson (1908/13), Patrick McGuire(1910/11), Harry Reynolds(1907-08) na Alexander ‘Sandy’ Turnbull (1906-15).