'Heshimu IEBC,'Mungatana amzima Kioni kuhusu madai ya ushindi wa Raila

Katibu Mkuu wa Jubilee Jeremiah Kioni ameshambuliwa kwa madai kuwa IEBC ilivuruga uchaguzi na kumpendelea Rais William Ruto.

Seneta wa Tana River Danson Mungatana (UDA) amekosoa madai hayo na kumtaka mbunge huyo wa zamani kuheshimu IEBC na Mahakama ya Juu ambayo iliidhinisha uchaguzi huo.

Akihutubia kikao na wanahabari katika majengo ya Bunge Alhamisi, Mungatana alisema kuwa Kioni hakuwajibika katika matamshi yake.

"Je, anawezaje kuja na karatasi kuonyesha kwamba hiyo ni sahihi zaidi kuliko IEBC ilivyosema?"

Tuna jukumu kama viongozi kuheshimu taasisi katika Nchi hii. Na ikiwa hawezi kuheshimu IEBC, basi aiunge Mahakama ya Juu," Alisema Mungatana.

Mnamo Jumatano, Kioni alidai kuwa Raila alishinda uchaguzi wa urais wa Agosti 9, 2022.

Alidai kuwa Raila alipata kura milioni 8.17 sawa na asilimia 57.53 ya kura zilizopigwa huku Ruto akipata kura milioni 5.91 sawa na asilimia 41.66 ya kura zote zilizopigwa.

"Hatuna sababu ya kutilia shaka habari zilizothibitisha hofu yetu,Wewe ni mtu msomi, ukitaka kufanya mambo njoo na taarifa za kuaminika, si unakuja na karatasi unasema mtu ambaye hajatambulika ana ukweli,” alisema.

"Tunataka upinzani ustawi. Tunataka upinzani ufanye kazi yake. Lakini kutuzingatia haimaanishi kuja na karatasi ambayo haijathibitishwa," Aliongeza.