Ruto aapa kuchukua hatua dhidi ya 'wahalifu' waliovamia na kuteketeza sehemu ya bunge

Rais William Ruto ameapa kuchukua hatua za haraka na madhubuti dhidi ya "wahuni" waliovamia na kuteketeza majengo ya Bunge.

Kulingana na Ruto, waliofanya vitendo hivyo viovu walikuwa wahalifu waliotumia maandamano ya amani kupinga mswada wa fedha na lazima wakabiliane na nguvu za sheria.

Alisema pamoja na kwamba vijana hao walikuwa na haki ya kufanya maandamano hayo, inasikitisha kuwa kuna vipengele vichache vilivyotumia fursa hiyo kujihusisha na vitendo vya uhalifu.

"Wale walienda kuchoma bunge sio hawa watoto, sio watoto wetu, ni wahalifu ambao tutawatafuta na hawatahepa," alisema.

“Hawatatoroka, huwezi kuharibu mali ya umma,” alisema.

Mkuu wa nchi ambaye alikuwa akizungumza wakati wa mkutano na maaskofu wa African Independent Pentecostal Church Africa (AIPCA) alisema hakuna sababu kabisa kwa nini baadhi ya watu wanaweza kushiriki katika uharibifu wa mali huku wakidai kuwa wanaandamana.

Ruto alisisitiza haja ya kutofautisha maswala yanayoibuliwa na vijana na uhalifu katika mchakato huo.

"Je, kuharibu, kupora mali au kuchoma ofisi ya CDF kutatusaidiaje kushughulikia masuala yanayoibuliwa?" alihoji.

"Lazima tutenganishe masuala yanayoibuliwa na vijana wetu na uhalifu wa wanaopora maduka ya watu. Haya ni masuala tofauti na lazima tuyashughulikie jinsi yalivyo," alisema.

Pia aliwatetea vijana waliojitokeza kufanya maandamano hayo akisema walikuwa na amani na walifanya hivyo bila kujali makabila yao.

Ruto wakati uo huo alionyesha matumaini kwamba mashirikiano ya sekta mbalimbali yaliyopangwa yatasaidia kushughulikia masuala muhimu yanayokabili nchi.

Mkuu wa Utumishi wa Umma Felix Koskei alianza mchakato Jumamosi wa kuanzisha mazungumzo ya kitaifa.

Koskei alitangaza kwamba mashirika yote mwamvuli ya ngazi ya kitaifa yanayowakilisha vijana, asasi za kiraia, mashirika ya kidini, mashirika ya kitaaluma, mashirika ya jumuiya ya wafanyabiashara, wasomi, uongozi wa wanafunzi, viongozi wengi na wachache katika Bunge, Baraza la Magavana na wadau wengine wanatakiwa kuteua. wawakilishi watakaounda Kamati ya Kitaifa ya Uongozi ya NMSF.

Alibainisha kuwa kamati hiyo yenye watu 100 itakuwa chombo kikuu cha NMSF, chenye jukumu la kutoa mfumo, utaratibu, ajenda na muda wa mazungumzo ya nchi nzima kuhusu masuala yaliyotolewa na vijana.

Masuala hayo ni pamoja na ajira, sera ya taifa ya kodi, mzigo wa deni la taifa, uwakilishi na uwajibikaji, hatua za kupambana na rushwa na ajenda nyingine yoyote itakayoonekana inafaa.

"Kila shirika mwamvuli linaombwa kuteua wawakilishi wawili wa jinsia yoyote kwa kuzingatia BMT," Koskei alisema.

"Uteuzi huo unapaswa kuelekezwa kwa Ofisi ya Rais, Harambee House."