•Serikali inaendelea kuchunguza vyanzo vingine vya fedha kutoka IMF na vyanzo vingine, ikiwa ni pamoja na majadiliano kuhusu mpango mpya na Benki ya Dunia (WORLD BANK).
•Mswada wa Fedha wa 2024 uliondolewa baada ya kulalamikiwa na umma, hali ambayo imeongeza hitaji la mikopo zaidi.
Image: EZEKIEL AMING'A
Kenya inatarajiwa kupokea shilingi bilioni 181.3 kutoka kwa Shirika la Fedha la Kimataifa (IMF) mwaka huu kufuatia mawasiliano kutoka kwa Gavana wa Benki Kuu ya Kenya, Dkt. Kamau Thugge.
Hii inajumuisha $1.4 bilioni za malipo yanayotarajiwa pamoja na $600 milioni kutoka kwa tathmini ya hivi karibuni.
Thugge alieleza matumaini yake kwamba mkutano wa bodi utaandaliwa hivi karibuni ili kumaliza malipo haya.
Katibu Mkuu wa Hazina, Chris Kiptoo, pia alionyesha kuwa serikali inaendelea kuchunguza vyanzo vingine vya fedha kutoka IMF na vyanzo vingine, ikiwa ni pamoja na majadiliano kuhusu mpango mpya na Benki ya Dunia (WORLD BANK).
Kenya inatafuta hadi shilingi bilioni 770 mwaka huu, ambapo shilingi bilioni 430 inatarajiwa kupatikana kupitia mikopo ya ndani.
Mswada wa Fedha wa 2024 uliondolewa baada ya kulalamikiwa na umma, hali ambayo imeongeza hitaji la mikopo zaidi.
Rais William Ruto alikiri kuwa Kenya lazima ikope angalau shilingi trilioni 1.2 mwaka huu, ikiwa ni pamoja na shilingi bilioni 169 za haraka ili kufidia upungufu wa bajeti.
Masharti ya mkopo wa IMF kwa Kenya yanajumuisha ongezeko la kodi, kupunguzwa kwa ruzuku, na kudhibiti matumizi ya serikali.
Licha ya changamoto za deni la Kenya, ikiwemo malipo ya riba yanayochukua asilimia 38 ya mapato ya kila mwaka, nchi ina matumaini ya kujaza pengo la fedha kupitia masoko ya hisa ya kimataifa.
Tathmini za hivi karibuni za IMF zilipunguza mpango wa Extended Fund Facility (EFF) na Extended Credit Facility (ECF) wa Kenya kwa $288 milioni kutokana na malipo ya sehemu ya Eurobond ya $2 bilioni.
Ili kushughulikia pengo la mapato lililosababishwa na kuondolewa kwa Mswada wa Fedha, Ruto alitia sahihi Sheria ya Marekebisho ya Bajeti, ikileta kupunguzwa kwa shilingi bilioni 145.7 katika bajeti.
Msaada wa IMF unaendelea kuwa muhimu kwa utulivu wa kiuchumi wa Kenya huku serikali ikiendelea kutafuta ufadhili wa ziada kutoka kwa washirika wa maendeleo wa kibiashara na kimataifa.