Mwanariadha Rebecca Cheptegei kuzikwa kwa heshima kamili za kijeshi nchini Uganda

Mwanariadha Rebecca Cheptegei azikwa kwa heshima kamili za kijeshi nchini Uganda

Mwanariadha wa Uganda wa Olimpiki Rebecca Cheptegei, aliyefariki baada ya kumwagiwa petroli na kuchomwa moto na mpenzi wake wa zamani, amezikwa leo Jumamosi kwa heshima kamili ya kijeshi.

Cheptegei alirejea nyumbani kwake katika nyanda za juu magharibi mwa Kenya, eneo maarufu kwa wanariadha wa kimataifa kwa vifaa vyake vya mazoezi vya mwinuko, baada ya kushika nafasi ya 44 katika mbio za marathon katika Michezo ya Olimpiki ya Paris mnamo Agosti 11.

Mashindao ya olimpiki ya Paris yalikuwa ndio mashindano yake ya riadha ya mwisho kwenye uso wa dunia.

Wiki tatu baadaye mpenzi wake wa zamani, Dickson Ndiema Marangach, alidaiwa kumvamia Cheptegei alipokuwa akirejea kutoka kanisani akiwa na binti zake wawili na dadake mdogo katika kijiji cha Kinyoro, polisi wa Kenya na familia yake walisema.

Babake Joseph Cheptegei aliambia Reuters kwamba bintiye alifika polisi angalau mara tatu kuwasilisha malalamiko dhidi ya Marangach, hivi majuzi Agosti 30, siku mbili kabla ya madai ya kushambuliwa na mpenzi wake wa zamani.

Alipata majeraha ya moto hadi 80% ya mwili wake na alikufa kwa majeraha siku nne baadaye.

"Sidhani nitaweza," alimwambia baba yake wakati akitibiwa hospitalini, alisema.

"Nikifa, nizike tu nyumbani Uganda."

Kifo cha Cheptegei kilizua hasira kutokana na viwango vya juu vya dhuluma dhidi ya wanawake nchini Kenya, hasa katika jumuiya ya riadha, huku mwanariadha huyo akiwa mwanariadha wa tatu  kudaiwa kufariki mikononi mwa mpenzi wake tangu 2021.

Mafanikio ya michezo ya Cheptegei ni pamoja na kushinda Mashindano ya Dunia ya Mountain and Trail Running 2021 nchini Thailand, na mwaka mmoja baadaye kupata nafasi ya kwanza katika Padova Marathon nchini Italia na kuweka rekodi ya kitaifa ya marathon.

Alizaliwa mashariki mwa Uganda mwaka wa 1991, alikutana na Marangach wakati wa ziara ya mafunzo nchini Kenya, baadaye akahamia nchini kutekeleza ndoto yake ya kuwa mwanariadha wa kiwango cha juu.

Marangach alifariki siku chache baada ya Cheptegei, kutokana na kuchomwa moto wakati wa shambulio hilo, na hivyo kugawanya maoni kati ya waendeshaji jamii.

Hali ya kifo cha Cheptegei ilishangaza ulimwengu, lakini jina lake bado linaweza kuwatia moyo wanariadha wa siku zijazo, huku mji mkuu wa Ufaransa ukipanga kutaja kituo cha michezo kwa heshima yake.

"Alitushangaza hapa Paris. Tulimwona. Uzuri wake, nguvu zake, uhuru wake," meya wa jiji hilo Anne Hidalgo aliwaambia waandishi wa habari. "Paris haitamsahau."