DJ Brownskin adaiwa kurekodi mkewe akifariki kwa kunywa sumu mbele ya watoto wake

Video yenye ukakasi ikionyesha jinsi mke wa DJ Brownskin alivyojitoa uhai kwa kunywa sumu imeibuka mitandaoni na kuzua hisia mseto.

Katika video hiyo ambayo inadaiwa kurekodiwa na Brownskin mwenyewe, inaanza pale ambapo mke wake anaonekana akikoroga mchanganyiko wa dawa zenye sumu kwenye kikombe.

Wakati huo wote mume wake, DJ Brownskin ako nyuma ya kamera na anadhaniwa kuwa ndiye anarekodi, huku mke wake akimwambia kuwa anataka kujiua.

Baada ya kukoroga sumu ile kwa kijiko kwa sekunde kadhaa za kuhesabika, mkewe anapiga funda moja zito la sumu na kutupa kikombe kando kisha kuketi kwenye kochi.

Dakika chache baadae anaanza kutokwa na pofu jingi mdomoni na kuwaambia watoto wake kuwa “nakufa wanangu” – lakini muda wote huu Brownskin haonekani kuchukua hatua yoyote ya dharura kujaribu kuokoa maisha ya mkewe, bali anaendelea kumrekodi akijigaragaza kwenye kochi kisha kuanguka sakafuni.

Baada ya kuanguka sakafuni, Brownskin anamuita msichana mmoja - anayedhaniwa kuwa mjakazi - aliyefika kwenye sebule na kumtaka kumpa maziwa.

“Kuna maziwa, hebu mpe maziwa, mlazimishie akunywe,” Brownskin anasikika akimwambia msichana yule.

Hata hivyo, mkewe wakati huu anaonekana kulemewa kabisa na sumu na yuko sakafuni anajigaragaza kutokana na makali ya sumu mwilini, hawezi hata kushika kikombe cha maziwa na msichana yule anaonekana kuchanganyikiwa hajui cha kufanya.

Msichana anajaribu kumlazimishia mdomoni na wakati huu watoto wake wadogo wanafika na kumuuliza baba yao ni nini kimetokea kwa mama yao.

Brownskin ambaye haonekani kushtushwa na kitendo hicho anamwambia mtoto mmoja “patia mama maziwa”.

Mkewe anang’ang’ana mwenyewe sakafuni hadi kuzima kabisa na video hiyo imezua maoni kinzani kwenye mitandao ya kijamii, baadhi wakimtuhumu Brownskin kwa kuangalia mkewe akijitoa uhai bila kuchukua hatua yoyote na wengine wakisema hakuna kitu angefanya kumsaidia mtu ameamua kujitoa uhai.