Ulinzi wa Ruto, Savula ataka baadhi ya polisi kuondolewa

Mbunge wa Lugari Ayub Savula amesema kuwa walinzi ambao wanalinda mali binafsi ya Naibu wa Rais William Ruto wanafaa kuondolewa.

Savula ambaye alikuwa akizungumzia suala la ulinzi wa naibu rais ambaye wandani wake walikuwa wamedai kwamba amepokonywa walinzi.

Waziri wa usalama Fred Matyang'i hata hivyo alipuuzilia mbali madai hayo akisema kwamba naibu rais ana ulinzi wa kutosha akiwa amepewa jumla ya maafisa 257 wa polisi huku baadhi yao wakitumika kulinda mali yake ya kibinafsi.

Savula alisema kwamba polisi hao wanafaa kurejeshwa kwenye vituo vyao ili wachangie kwenye maandalizi ya uchaguzi mkuu ujao kwani utakuwa ni uchaguzi wa mpito na utahitaji usalama wa hali ya juu.

Savula alikuwa akizungumza siku ya Alhamis katika kanisa la P.A.G Bahati wakati wa Ibaada ya wafu ya aliyekuwa mwanachama wa ANC Macleans Sloya.

Alisema kuwa si vyema kwa polisi wanaofaa kuwapa wakenya ulinzi waendeleze shughuli za kulinda mali ya mtu binafsi.

Tayari waziri wa usalama wa ndani Fred Matiang’i aliweka bayana orodha ya polisi wanaolinda mali mbali mbali za naibu rais suala ambalo limezidi kuibua mjadala mkali nchini.

Savula pia alitumia fursa hiyo kuwahakikishia wakenya kwamba kinara wa ANC Musalia Mudavadi atakuwa kwa debe la urais mwaka 2022.