Sikumuidhinisha Kalonzo kuwania Urais 2027-Raila afafanua

Kiongozi wa Azimio Raila Odinga amejitokeza kufafanua ripoti za vyombo vya habari kwamba alimuidhinisha kiongozi wa Wiper Kalonzo Musyoka kuwania urais katika uchaguzi mkuu wa 2027.

Katika taarifa yake siku ya Jumatatu, Raila alisema alimsifu Kalonzo kwa uamuzi wake dhabiti wa kumuunga mkono katika uchaguzi mtawalia.

Alisisitiza sifa hiyo ni kukiri na kuthamini matendo yake mema.

Alifafanua kuwa matamshi yake hayamaanishi kuwa ana nia ya kuacha siasa kali.

"Katika hotuba yake, Odinga anafafanua kwamba sifa zake kwa H.E Kalonzo Musyoka kwa kusimama naye katika chaguzi tatu mfululizo, maadili yake thabiti ya Kikristo na uungwaji mkono ambao Musyoka amejenga kote nchini haukuwa uthibitisho wa Bw Musyoka kama mgombeaji urais wa Azimio 2027. ," taarifa ya msemaji wa Raila Dennis Onyango ilisema.

"Maneno yake ya kumsifu Bw Musyoka hayakukusudiwa kumaanisha kuwa alikuwa na au anakusudia kuacha siasa kali."

Waziri Mkuu huyo wa zamani alibainisha kuwa ni mapema mno kwa chama chochote cha kisiasa kutaja mgombeaji wake wa urais kwani Wakenya wana miaka minne kabla ya kuelekea uchaguzi mkuu ujao.

Raila alisema Azimio inasalia kuwa muungano wa watu sawa ambapo kila kiongozi ana nafasi ya haki na sawa ya kuwa kinara wa 2027 kulingana na uhusiano wao na wanachama wa chama.

"Mgombea huyo, hata hivyo, hatatajwa hadi mwaka mmoja au miezi michache tu kabla ya uchaguzi wa 2027."

Raila hata hivyo alibainisha kuwa anaamini kuwa Kalonzo ana uwezo wa kumshinda Rais William Ruto katika kinyang'anyiro cha urais huru na wa haki kinyume na madai ya hivi majuzi ya Ruto kwamba atamshinda Kalonzo kirahisi.