•Dkt Mutea alisema kuwa mwili wa marehemu Rita Waeni ulikabidhiwa kwa familia mnamo Februari 2 na wapelelezi wa DCI.
•Familia ilichukua fursa hiyo kushinikiza wapelelezi kufanya uchunguzi wa kina kuhusiana na kifo cha binti yao aliyeuawa.
Image: HISANI
Marehemu Rita Waeni Muendo, mwanafunzi mrembo wa chuo kikuu aliyeuawa kikatili mwezi uliopita katika eneo la Roysambu, Nairobi hatimaye amezikwa
Msichana huyo wa miaka 20 alizikwa nyumbani kwao Makueni katika hafla ya faragha iliyohudhuriwa na jamaa zake wa karibu. Msemaji wa familia alishiriki taarifa kwa vyombo vya habari akiarifu kuhusu maendeleo.
Katika taarifa, Dkt Lilian Mutea alisema kuwa mwili wa marehemu Rita Waeni ulikabidhiwa kwa familia mnamo Feb 2 na wapelelezi wa DCI baada ya kufanya uchunguzi wao kikamilifu.
“Leo asubuhi, Februari 5, 2024, mwili wa Waeni ulizikwa kwenye sherehe ya faragha ambayo ilihudhuriwa na familia yake pekee. Ibada ya mazishi na mazishi ilifanyika nyumbani kwa mzazi wake katika Kijiji cha Mukimwani, eneo la Kalimani, Tarafa ya Kisau, Kaunti ya Makueni," Mutea alisema.
Familia pia ilichukua fursa hiyo kushinikiza wapelelezi kufanya uchunguzi wa kina kuhusiana na kifo cha binti yao aliyeuawa.
"Tunajua kwamba watu wengi wameelewa kina cha hasara hii na kwa hivyo uamuzi wa faragha katika hafla hii. Tunatoa wito kwa serikali kufanya uchunguzi wa kina, ili haki ya Waeni itendeke,” taarifa ilisoma.
Marehemu Rita Waeni aliuawa kikatili mnamo Januari 14, katika chumba cha kukodi cha AirBnb, mtaani Roysambu, Nairobi.
Takriban wiki mbili zilizopita, familia ya Waeni ilitambua kichwa cha binadamu kilichopatikana katika bwawa kuwa cha binti huyo.
Hii ilifanywa kupitia paji la uso wake, nywele na malezi ya meno.
Hatua hiyo iliwapa wanapatholojia wakiongozwa na Chifu Oduor kibali cha kufanya uchunguzi wa kichwa kama sehemu ya juhudi za kubaini jinsi alikufa mnamo Januari 13 katika ghorofa moja ya Roysambu, Nairobi.
Zoezi hilo lilifanywa katika chumba cha kuhifadhi maiti cha City kufuatia lile la awali lililokuwa limefanywa kwenye sehemu nyingine za mwili.
Familia hiyo ilikuwa imetambua blauzi ambayo ilikuwa imezungushiwa kichwani ilipogunduliwa katika bwawa la Kiambaa, Kaunti ya Kiambu.
Maafisa wa upelelezi wanashuku mauaji ya Waeni yalikuwa sehemu ya uchawi unaoendelea nchini.
Uchawi ni sehemu ya sababu kuu za mauaji nchini na timu ya uchunguzi ilisema ni sehemu ya nadharia wanazochunguza kama sababu ya mauaji ya kinyama.
"Inaonekana kama ibada ambayo nadhani ilichochewa na imani kama ya kidini," afisa mmoja anayefahamu suala hilo alisema.
Timu ya uchunguzi inataka kujua ikiwa kuna mauaji zaidi kama yale ya Waeni.