•Mshukiwa Kevin Kinyanjui Kang'ethe amekamatwa tena baada ya kutoroka ghafla kutoka mikononi mwa polisi, polisi wamesema.
•Polisi walikuwa wamemfuatilia hadi Ngong baada ya dalili zote kuonyesha alikuwa katika eneo hilo.
Image: SUSAN MUHINDI
Mshukiwa wa mauaji aliyetoroka Kevin Kinyanjui Kang'ethe amekamatwa tena baada ya kutoroka ghafla kutoka mikononi mwa polisi, polisi wamesema.
Kang’ethe alikamatwa katika eneo la Embulbul, Ngong siku ya Jumanne jioni alipokuwa akitafuta hifadhi katika nyumba moja ya jamaa zake.
Mkuu wa polisi wa Nairobi Adamson Bungei alithibitisha kukamatwa kwa watu wengine.
“Tumemkamata tena. Yuko kizuizini na tunawashukuru wote waliosaidia katika hili,” alisema.
Alifikishwa Nairobi chini ya ulinzi mkali kabla ya kufikishwa mahakamani.
Polisi walikuwa wamemfuatilia hadi Ngong baada ya dalili zote kuonyesha alikuwa katika eneo hilo.
Kang'ethe alitoroka kutoka kituo cha polisi cha Muthaiga mnamo Februari 7 katika kisa kilichoshangaza wengi. Alikuwa anasubiri kurejeshwa Marekani kufuatia waranti ya kukamatwa kwake iliyotolewa Massachusetts.
Alikamatwa katika mtaa wa Westlands mnamo Januari 30 na alipaswa kurejeshwa Marekani alipotoroka kutoka kizuizini.
Kang'ethe, 40, alikuwa amezuiliwa akisubiri uamuzi wa iwapo anafaa kurejeshwa Marekani ili kujibu shtaka la mauaji ya daraja la kwanza kuhusiana na kifo cha mke wake Margaret Mbitu mnamo Oktoba 31, 2023.
Polisi wa Jimbo la Massachusetts walisema mapema Novemba 2023, Kang'ethe aliacha mwili wa marehemu mkewe kwenye gari kwenye Uwanja wa Ndege wa Kimataifa wa Logan na kupanda ndege kuelekea Kenya.
Maafisa wa Massachusetts walisema walikuwa wakishirikiana na mamlaka ya Kenya kumtafuta.
Baadaye alikamatwa katika klabu ya usiku mnamo Januari 30 baada ya kutoweka kwa miezi mitatu.
Kang'ethe alikuwa ameukana uraia wake wa Marekani, jambo ambalo lilisababisha mchakato wa kumrejesha katika nchi hiyo ya Magharibi.
Mahakama ya Nairobi ilikuwa imeidhinisha ombi la polisi la kumzuilia kwa siku 30 huku suala la kurejeshwa nchini Marekani likisikilizwa.
Maafisa walisema kama angekuwa raia wa Marekani, angerudishwa nyumbani bila mchakato wa mahakama.
Kakake Kangethe alizuiliwa Jumatatu kwa mahojiano kuhusu kutoroka kwake kutoka mikononi mwa polisi.
Mwingine aliyekuwa akihojiwa ni mpenzi wa kakake, polisi walisema.
Walikuwa watu wanaohusishwa na kesi ambapo Kang'ethe alikuwa akitafutwa kwa mauaji nchini Marekani na kutoroka kutoka kizuizini cha polisi.
Wawili hao walichukuliwa Jumatatu jioni kutoka kwa ghorofa moja katika eneo la Ololua, Ngong na Westlands na kuchukuliwa kwa mahojiano.
Haijabainika ni nini polisi walitaka kujua kutoka kwao lakini wadadisi wa habari walisema huenda ndugu huyo alizungumza na Kang'ethe baada ya kutoroka kutoka kituo cha polisi cha Muthaiga mnamo Februari 7.
Polisi wanaamini Kangethe alikutana na kaka yake baada ya kutoroka kizuizini.
Makumi ya wapelelezi walikuwa wamepewa jukumu la kumsaka Kang'ethe kwa uwezekano wa kufikishwa mahakamani na kurejeshwa Marekani.