Polisi wafichua ukatili zaidi wa Hashim Dagane

Maafisa wa ujasusi wanaochunguza kisa ambapo mwili wa mtu asiyejulikana ulipatikana na majeraha mabaya katika eneo la Lang’ata wanasema kuwa huenda mwathiriwa aliuwawa na mshukiwa mkuu wa mauaji ya mwanamke na mwanawe pamoja na mpwa wake kutoka mtaani Eastleigh kaunti ya Nairobi.

Maafisa hao wamesema kupitia ukurasa wa X kuwa mkondo wa uchunguzi umepata mwanya mkubwa wa kutambua mshukiwa aliyetupa mwili wa marehemu uliopatikana mnamo Oktoba 31. Kwa mujibu wa DCI, mshukiwa mkuu wa mauaji ya familia moja kutoka Eastleigh Hashim Dagane huenda alihusika na ukatili huo.

Kulingana na taarifa ya DCI kutokana na vifaa vya ushahidi walivyokusanywa palipotupwa mwili wa marehemu, uchunguzi uliwaelekeza katika duka la jumla la Quickmart kati kati mwa jiji la Nairobi na kubaini kuwa mwanamke anayedaiwa kuuliwa na mwili wake kutupwa huenda ulikuwa wa mwanamke alioenekana kwenye kanda za CCtv za duka hilo tarehe 29 Oktoba.

Uchunguzi umebaini pia mwanamke huyo alielekea katika sehemu ya makazi kwenye mtaa Lavington ambapo pia kamera za siri zilimnasa akiingia nyumbani huko.

Polisi wanaamini kuwa mwanamke  huyo alikuwa pamoja na Hashim katika nyumba hiyo.

Baada ya kukagua kamera za CCtv, polisi waligundua kuwa siku iliyofuata Hashim alitoka na mifuko miwili mikubwa inayoshukiwa kuwa mabaki ya mwili ya marehemu aliyotupa eneo la Lang’ata.

Kufuatana na uchunguzi huo, polisi wanaamini kuwa mwili wa mwanamke uliopatikana ni wa Deka Abdinoor Gorone aliyeripotiwa kupotea katika kituo cha polisi cha California tarehe 24 Oktoba.

Hata hivyo polisi wanamtafuta mmiliki wa nyumba inayodaiwa kuwa Hashim alitekeleza unyama wake katika eneo la Lavington ambaye inaaminika kuwa baada ya kugundua shughuli ambayo Hashim alitekeleza kwenye nyumba hiyo alipaka rangi mpya na kuenda mafichoni.