Watahiniwa 2 wa KCSE wapatikana na simu wakati wa mtihani

Visa vya udanganyifu katika mchakato unaoendelea wa mtihani wa kitaifa kwa watahiniwa wa kidato cha nne vinaendelea kurekodiwa kisa cha hivi punde kikirekodiwa katika shule ya upili ya Membley eneo la Ruiru, kaunti ya Kiambu.

Katika siku ya tatu, wanafunzi wawili walipatikana na simu katika chumba cha mtihani wakati mtihani ulikuwa unaendelea kisa ambacho kilidhibitishwa na naibu kamishna wa kaunti Julius Too.

Kulingana na afisa wa DCIO eneo la Ruiru  Jeremiah Ndubi amesema kuwa simu ya kwanza ilipatikana wakati wa kuwakagua wanafunzi kabla ya kuingia katika chumba cha mitihani jambo lililowafanya kufanya ukaguzi zaidi na hatimaye kupata simu nyingine ikiwa na mwanafunzi wa pili.

Aidha DCIO Jeremiah amehakikisha kuwa mtihani haujaibiwa na simu zilizopatikana wakati wa mtihani zinakaguliwa kubaini ikiwa zilikuwa zilikuwa na mitihani au la.

Hata hivyo Jeremiah amesema kuwa kupatikana na simu wakati wa mtihani ni kinyume na sheria na hatua za kisheria zitachukuliwa dhidi wahusika waliopatikana kutokakwa baraza kuu la mitihani nchini KNEC.

Licha ya kisa hicho kufanyika , naibu kamishna amesema kuwa usambazaji wa mitihani katika vituo 18 kwenye kaunti ndogo ya Ruiru inafanyika vyema.

Tangu mitihani hiyo ya nadharia kung’oa nanga rasmi kote nchini siku ya Jumatatu, visa kadhaa vya udanganyifu vimerekodiwa katika maeneo kadhaa.

Mnamo Jumatatu, katika kaunti ya Nairobi na Kilifi washukiwa wawili walikamatwa kwa kujifanya wanafunzi waliokuwa wamesajiliwa kama watahiniwa.