Tusker walikosa kupanda alama sita kileleni mwa ligi baada ya kutoka sare ya 1-1 na KCB katika mechi ya ligi ya FKF jana. Sammy Mejaa aliweka Tusker mbele kunako dakika ya nne kabla ya Kevin Kimani kusawazishia Wazito katika dakika ya 21.
Wana mvinyo hao sasa wako alama nne mbele ya KCB baada ya mechi 18.
Kiungo wa Kenya Henry Ochieng ameondoka klabu ya Watford, baada ya kujiunga nao mwezi Januari, kutoka Cork City ya Ireland kwa mkopo.
Ochieng ni mmoja kati ya wachezaji 13 waliotemwa kwani hawakua katika mipango ya Watford baada ya kupandishwa kurejea EPL msimu huu. Ochieng mwenye umri wa miaka 22 alichezea Harambee stars ya vijana wasio zidi umri wa miaka 23 dhidi ya Mauritius.
Mwenyekiti wa shirikisho la michezo ya shule za upili nchini Peter Orero amewahakikishia wanafunzi na walimu kuwa michezo ya shule itarejea mwaka huu, baada ya kusitishwa tangu mwaka jana kufuatia mchipuko wa janga la corona.
Hii ni kufuatia mikutano kati ya maafisa wa michezo nchini na wizara ya elimu mjini Nakuru. Orero amesema watahakikisha wanafuata kanuni za covid-19 ipasavyo ili kuzuia maambukizi zaidi.
Kocha wa kikosi cha wanawake nchini cha voli boli Paul Bitok ana wasiwasi kutokana na ukosefu wa mechi za kirafiki na mazoezi ya nje kama ilvyoratibiwa hapo awali.
Malkia Strikers walifaa kuelekea Brazil kwa mazoezi na mechi kadhaa za kirafiki lakini safari ilitibuka kutokana na mchipuko wa janga la korona. Timu hiyo imo kambini katika uwanja wa Kasarani.