Shabiki mkongwe wa kandanda Isaac Juma afariki baada ya kushambuliwa nyumbani Mumias

Shabiki Mkongwe wa Harambee Stars,  AFC Leopards Isaac Juma  ameaga dunia kufuatia shambulio la mshambuliaji nyumbani kwake Mumias, Kaunti ya Kakamega.

Polisi walisema wamemkamata mshukiwa wa shambulio hilo.

Maafisa wanaoshughulikia suala hilo walisema uchunguzi wa awali ulihusisha mauaji yake na mzozo wa ardhi katika eneo hilo.

Maafisa walisema Juma aliuawa kwa kukatwakatwa na mshambulizi mnamo Jumatano mwendo wa saa tano usiku.

Juma alikuwa mpenzi wa soka na aliunga mkono kwa dhati timu ya taifa, Harambee Stars.

Mkuu wa polisi Kanda ya Magharibi Peris Muthoni alisema wanamhoji mshukiwa kwa habari zaidi.

"Tuna mshukiwa wa mauaji hayo kujua zaidi," alisema.

Pia alikuwa shabiki sugu wa AFC Leopards.

Mkewe aliwaambia polisi kuwa kisa hicho kilitokea kutokana na mzozo wa ardhi ambao umekuwa haujakamilika.

Mwili wake ulichukuliwa baadaye na kupelekwa katika chumba cha kuhifadhi maiti huku uchunguzi ukiendelea.