Liverpool wapata kocha mpya wa kumrithi Jurgen Klopp

Meneja wa Feyenoord Arne Slot amethibitisha kuwa anataka kuhamia Liverpool kama kocha wa kumrithi Jurgen Klopp anayeondoka.

Mholanzi huyo ndiye anayelengwa na wababe hao wa Anfield huku wakijiandaa kwa maisha bila Jurgen Klopp, ambaye anajiandaa na mechi zake chache za mwisho kuinoa klabu hiyo.

Licha ya kuhusishwa mara kwa mara na Xabi Alonso, Roberto De Zerbi na Ruben Amorim, Slot anaaminika kuwa chaguo kuu la Liverpool kuchukua nafasi ya meneja wao mashuhuri wa Ujerumani na mazungumzo yanaendelea.

Feyenoord, hata hivyo, hawataki kumpoteza meneja wao na wanatarajiwa kudai fidia kubwa kwa mtu ambaye aliwaongoza kutwaa taji la kwanza la Eredivisie katika miaka sita msimu uliopita.

Akizungumza kabla ya mechi ya Feyenoord huko Go Ahead Eagles Alhamisi usiku, Slot aliiambia ESPN: "Kitu pekee ninachoweza kusema kuhusu hilo ni kwamba vilabu viko kwenye mazungumzo - na kisha ukae kwenye chumba cha kusubiri na kusubiri kitakachotoka.”

"Inaonekana wazi kwangu kwamba ningependa kwenda Liverpool. Sasa nasubiri kuona kama vilabu vinafikia makubaliano. Nina imani na hilo."

Slot aliongeza: "Vilabu vinapaswa kufanya kazi yao na kisha mimi nasubiri, na kama 'mhusika mkuu' lazima niheshimu hilo.

"Bila shaka itakuwa wazi katika siku zijazo."

Feyenoord - ya pili kwenye jedwali la Eredivisie, huku PSV Eindhoven wakiwa kileleni - walishinda Kombe la Uholanzi mwishoni mwa wiki na msimu uliopita wa kiangazi uliongeza mkataba wa Slot hadi 2026.

Kwa hivyo, Liverpool wanaweza kutarajia Feyenoord kuchukua msimamo mgumu katika mazungumzo, na Slot anaweza kutaka kuchukua baadhi ya wafanyikazi wake kwenye Ligi ya Premia.

Imeripotiwa kuwa Liverpool italazimika kulipa "zaidi ya euro milioni 10" ikiwa wanataka kumpata mkufunzi wao.

Slot amekataa ofa za awali za kufanya kazi kwenye Premier League, Mholanzi huyo akiamua kutochukua kazi ya Leeds baada ya kumtimua Jesse Marsch Februari mwaka jana.

Imeripotiwa pia kwamba Slot alijiondoa katika kinyang'anyiro cha kuwania nafasi hiyo Tottenham kabla ya Ange Postecoglou kuteuliwa msimu uliopita wa joto.