Dabi ya Mashemeji yahairishwa

Dabi ya Mashemeji iliyokuwa ikisubiriwa kwa hamu imesitishwa baada ya Sports Kenya kutangaza kuwa Uga wa Nyayo hautakuwepo kwa pambano hilo kali la Novemba 24.

Leopards walikuwa tayari kuwakaribisha wapinzani wao Gor Mahia. Hata hivyo, wasimamizi wa klabu hiyo walithibitisha kuwa mechi hiyo haitachezwa baada ya juhudi zao za kupata kibali cha kutumia uwanja wa Nyayo kugonga mwamba.

“Tunasikitika kuwajulisha kuwa mechi ya FKF PL iliyokuwa ikisubiriwa kwa hamu - AFC Leopards SC dhidi ya Gor Mahia FC iliyoratibiwa kuchezwa Jumapili, saa kumi katika Uwanja wa Nyayo, Nairobi imeahirishwa,” taarifa ya klabu hiyo ilisema.

"Hii ni kutokana na kutopatikana kwa uwanja wa mechi, ambao unafanyiwa ukarabati kwa ajili ya maandalizi ya Mashindano yajayo ya CHAN 2025. Tutawasilisha tarehe zilizopangwa upya kwa wakati ufaao," ilihitimisha.

Klabu hiyo ilisema kuwa imepokea taarifa kutoka kwa mwakilishi wa Idara ya Ligi na Mashindano ya FKF, Dennis Muchiri, kuwafahamisha kuhusu kutopatikana kwa uga huo.

"Tunaandika kuhusu mechi nambari 79 ya FKF PL, AFC Leopards SC dhidi ya Gor Mahia FC iliyopangwa kuchezwa Jumapili, Novemba 24, saa kumi katika uwanja wa Nyayo, Nairobi. Kwa bahati mbaya, tunasikitika kuwafahamisha kuwa mechi hiyo imeahirishwa hadi tarehe nyingine kwa sababu uwanja unakarabatiwa kwa ajili ya mashindano ya CHAN 2025," Muchiri aliandika.

"Zaidi ya hayo, mechi hiyo inachukuliwa kuwa hatari zaidi na timu ya nyumbani imeshindwa kupata uwanja mbadala unaofaa. Tutawasiliana tarehe zilizopangwa upya kwa wakati ufaao. Asante kwa kuzingatia na tunaomba radhi kwa usumbufu uliojitokeza."

Leopards walisema sasa wataelekeza nguvu zao kwenye mechi inayofuata dhidi ya Shabana FC mnamo Novemba 27 katika uwanja wa Gusii, Kisii.

Viwanja vya Nyayo na Kasarani vimekuwa mwenyeji wa Mashemeji Dabi kwa miaka mingi sasa. Zote mbili kwa sasa zimefungwa kwa ukarabati.

Bila kutoa maelezo, Mkurugenzi Mkuu wa Michezo nchini, Pius Metto, alisema uwanja huo hauko tayari kuandaa mechi hiyo kubwa. 

"Hapana, Nyayo haiko tayari. Leopards itakapotoa ombi rasmi, nitawaeleza kwa nini kituo hicho hakipatikani," Metto alisema.

Sports Kenya ilisema uwanja huo kwa sasa unafanyiwa ukarabati na hivyo haufai kwa kuandaa mechi.  Serikali inapanga kuandaa mechi za CHAN 2025 katika uwanja wa Nyayo na Moi, Kasarani.