Chelsea ilikuwa na njaa ya ushindi, United ilijali zaidi biashara- Nemanja Matic afunguka

Nemanja Matic ametoa mtazamo wa kipekee kuhusu taaluma yake ya soka akiwa Chelsea na Manchester United, akieleza tofauti kubwa ya kifikra kati ya vilabu hivyo viwili vikubwa vya Uingereza.

Katika mahojiano na Andy Mitten wa The Athletic, kiungo huyo kutoka Serbia alieleza kuwa Chelsea ilikuwa na utamaduni wa kushinda uliokita mizizi katika kila ngazi ya klabu, tofauti kabisa na Manchester United ambayo, kwa mtazamo wake, ilikuwa na msukumo mkubwa wa kibiashara kuliko wa ushindani.

"Tofauti niliyoihisi baada ya Chelsea ni kwamba kule kila kitu kilihusu matokeo na kushinda makombe," alisema Matic.

"Hiyo ndiyo ilikuwa roho ya klabu nzima, hata kwa mtu anayekata nyasi," aliongeza.

Matic alishinda mataji mawili ya Ligi Kuu ya Uingereza, Kombe la FA, na Kombe la Ligi akiwa na Chelsea chini ya makocha waliotwaa mataji kama José Mourinho na Antonio Conte.

Kipindi chake Stamford Bridge kilitawaliwa na ushindani mkali na matarajio ya kila msimu kushinda mataji.

"Roman Abramovich alikuwa anatuuliza tu kuhusu matokeo," alisema, akimzungumzia mmiliki wa zamani wa Chelsea ambaye alijulikana kwa kutaka mafanikio ya haraka.

Matic alijiunga na Manchester United mwaka 2017 akitokea Chelsea, tena chini ya Mourinho.

Alicheza mechi zaidi ya 180 akiwa United na kufika fainali ya Europa League mwaka 2021, lakini hakufanikiwa kushinda taji lolote akiwa Old Trafford.

"United ilikuwa na mtazamo wa kibiashara zaidi," alisema Matic. "Nilianza kugundua hilo baada ya miezi michache ndani ya klabu. Naelewa kuwa mishahara yetu inahitaji kulipwa, lakini nilihisi kuwa matokeo hayakuwa kipaumbele kama ilivyokuwa Chelsea," aliongeza.

"Nadhani nilifanya kazi za kibiashara mara mbili tu nikiwa Chelsea," alisema.

"Lakini United, ilikuwa mara nyingi zaidi," alisisitiza.

Matic alisema alijiunga na United akiwa na ari ya kushinda makombe kama alivyofanya Chelsea, lakini polepole alianza kuhisi kuwa hilo halikuwa lengo kuu la klabu.

"Nilifika United nikiwa na hasira ya kushinda makombe kama nilivyokuwa nayo Chelsea, lakini hatua kwa hatua nilianza kuhisi kuwa makombe hayakuwa kipaumbele," alisema.

"Labda sikosei, lakini hivyo ndivyo nilivyohisi ndani yangu," alisisitiza.

Katika kipindi chake Manchester United, klabu hiyo ilimaliza nafasi ya pili kwenye Ligi Kuu ya Uingereza msimu wa 2020–21 na kufika fainali ya Europa League chini ya kocha Ole Gunnar Solskjær, lakini ilishindwa kutwaa taji baada ya kupoteza kwa penalti dhidi ya Villarreal.

Baada ya kuondoka United mwaka 2022, Matic aliungana tena na Mourinho katika AS Roma, kabla ya kujiunga na Rennes kisha baadaye Olympique Lyonnais nchini Ufaransa, ambako anacheza hadi sasa. Akitambulika kwa utulivu wake, akili ya kimchezo, na uongozi, kiungo huyo mwenye umri wa miaka 35 bado anaheshimika kila anapoenda.

Kauli zake zimezua mjadala mpana miongoni mwa mashabiki na wachambuzi, wakitafakari iwapo Manchester United imepoteza ari yake ya ushindani na kuangukia kwenye biashara zaidi ya soka. Tangu kustaafu kwa Sir Alex Ferguson mwaka 2013, klabu hiyo imekuwa ikihangaika kurejea kileleni mwa soka ya Uingereza na Ulaya licha ya kuwekeza fedha nyingi.

Maneno ya Matic hayajaonesha lawama bali ni mwanga wa ndani wa mchezaji aliyekuwa mstari wa mbele katika vilabu viwili vya hadhi kubwa. Na kwa uzoefu wake, anachokisema kina uzito mkubwa.