Kocha wa Saudia aliyeshinda Argentina ya Messi kombe la dunia ateuliwa kocha wa Ufaransa

Hervé Renard amejiuzulu kama kocha wa Saudi Arabia ili aweze kuchukua nafasi ya ukocha wa timu ya Ufaransa ya wanawake kabla ya Kombe la Dunia la Wanawake mwaka huu.

Mfaransa huyo mwenye umri wa miaka 54 aliteuliwa na Saudi Arabia mnamo Julai 2019 na kuiongoza nchi hiyo kushinda 2-1 dhidi ya Argentina kwenye Kombe la Dunia nchini Qatar mwaka jana.

Shirikisho la Soka la Saudi Arabia lilisema limekubali kusitisha mkataba wa Renard kwa ombi lake na kumtakia "kila mafanikio katika maisha yake ya baadaye".

Rais wake, Yasser al-Misehal, aliiambia Idhaa ya Michezo ya Saudia: “[Renard] ana ofa kutoka kwa shirikisho la Ufaransa na alionyesha nia yake ya kuchukua fursa hii. Tulifahamishwa siku nne kabla ya dirisha la sasa la kimataifa na nilipokea barua kutoka kwa shirikisho la Ufaransa, na kushauriana na wajumbe kadhaa wa bodi ya wakurugenzi, na tukaamua kukubali ombi hili."

Shirikisho la Soka la Ufaransa lilimfuta kazi kocha Corinne Diacre mwezi huu baada ya nahodha Wendie Renard, Kadidiatou Diani na Marie-Antoinette Katoto kusema hawatacheza Kombe la Dunia chini ya "mfumo wa sasa".

Ufaransa, iliyoorodheshwa ya tano duniani, itatafuta kushinda Kombe la Dunia la kwanza katika maonyesho ya mwaka huu, ambayo yanaandaliwa kwa pamoja na New Zealand na Australia kutoka 20 Julai hadi 20 Agosti.

Renard alisema baada ya kupoteza kwa mabao 2-1 katika mechi ya kirafiki na Bolivia mjini Jeddah siku ya Jumanne kwamba aliipeleka Saudi Arabia kadri alivyoweza.

"Nadhani nilifanya kiwango cha juu na timu," alisema. "Siwezi kufikia kiwango kingine kwa hivyo napendelea kuwa mwaminifu kwa kila mtu. Asante tena, ulikuwa wakati mzuri sana. ”… jarida la Guardian lilimnukuu.

Misehal alisema kocha mpya hatateuliwa hadi Juni mapema zaidi.