Kocha wa Ulinzi Starlets Joseph Wambua amefariki.
Mtangazaji wa Radio Jambo na ambaye ni kocha wa zamani wa Harambee stars Jacob ‘Ghost’ Mulee alithibitisha habari hizo za kusikitisha za kufariki kwa Wambua Ijumaa asubuhi na kumuomboleza kama rafikiye na mwenzake.
Ghost alifichua kuwa marehemu kocha huyo alikuwa mgonjwa na alifariki alipokuwa akipatiwa matibabu.
"Asubuhi ya huzuni sana kwa tasnia ya soka. Tumempoteza kocha chipukizi wa Ulinzi starlets aliyefanya kazi kwa bidii Joseph Wambua,” Ghost alisema.
“Amekuwa hospitali akipatiwa matibabu. Pumzika kwa amani rafiki yangu na mfanyakazi mwenzangu,” Ghost alisema.
Katika taarifa, klabu ya Ulinzi Stars iliomboleza marehemu kocha huyo kama mshauri, mwanga elekezi na msukumo kwa kila mtu katika klabu.
Klabu hiyo ilibaini kuwa marehemu alikuwa na mafanikio makubwa na alikuwa akijitolea kwa kazi yake ya ukocha.
"Chini ya uongozi wake, timu ilifikia hatua za kushangaza na kukuza roho ya umoja, uthabiti, na shauku ya mchezo. Kujitolea kwake na kujitolea kwake kwa ubora kutaacha athari ya milele kwa maisha ya wachezaji, wafanyikazi, udugu wa kandanda wa Kenya na wote ambao walikuwa na fursa ya kumjua,” ilisema taarifa ya Ulinzi Stars.
"Tunatuma rambirambi zetu kwa familia yake, marafiki, na wote walioguswa na urithi wake wa ajabu. Mawazo na maombi yetu yako pamoja nawe katika kipindi hiki kigumu. Pumzika kwa amani, Kocha Klopp Utakumbukwa milele, lakini ushawishi wako utadumu,” klabu hiyo ilisema zaidi.
