Dabi ya Mashemeji mashakani huku Sports Kenya ikitangaza kutopatikana kwa uga wa Nyayo

Dabi ya Mashemeji iliyosubiriwa kwa hamu iko mashakani baada ya Sports Kenya kutangaza kuwa Uwanja wa Nyayo hautapatikana kwa mechi hiyo.

AFC Leopards walikuwa na matumaini ya kuwakaribisha wapinzani wao wa jadi Gor Mahia katika uwanja huo siku ya Jumapili.

Bila kutoa maelezo, Mkurugenzi Mkuu wa Sports Kenya Pius Metto alisema uwanja huo hauko tayari kuandaa mechi kubwa zaidi ya klabu ya soka nchini. 

"Hapana, Nyayo haiko tayari. Leopards itakapotoa ombi rasmi, nitawaeleza kwa nini kituo hicho hakipatikani," Metto alisema.

Chanzo cha habari kutoka Sports Kenya kilisema kituo cha michezo kwa sasa kinafanyiwa ukarabati na hivyo hakifai kuandaa mechi. 

Serikali inapanga kuandaa mechi za CHAN 2025 katika uwanja wa Nyayo na Moi, Kasarani.

Serikali ilikuwa imechagua Kasarani kuandaa mechi za CHAN, huku viwanja vingi vikiwa vimeteuliwa kuwa viwanja vya mazoezi. 

Viwanja vya Kasarani, Ulinzi Sports Complex na Police Sacco Grounds vilitambuliwa kuwa mahali panapofaa kuandaa vipindi vya mafunzo. 

"Nyayo na Kasarani wanatayarishwa kwa CHAN. Kuna shughuli nyingi zinazohusiana na ujenzi zinazoendelea Nyayo, na kuifanya isifae kuandaa mechi," alisema afisa huyo ambaye hakutaka kutajwa jina.  

Mbadala pekee wa kiutendaji kutokana na kutopatikana kwa Nyayo ni Uwanja wa Kenyatta mjini Machakos, lakini Ingwe inaripotiwa kusita kuutumia kwa derby.