Tusker yamtuza Ogam kwa uchezaji wake bora

                                                                 Ryan Ogam

Mshambuliaji wa Tusker Ryan Ogam ametunukiwa tuzo ya Mchezaji Bora wa Mwezi Oktoba na Novemba kwa kutambua kiwango chake cha kuvutia cha upachikaji mabao.

Ogam amefikisha mabao saba katika mechi sita pekee, na kumfanya kuwa mfungaji bora wa sasa katika Ligi Kuu ya Kenya.

Tuzo hiyo iliamuliwa na kura kutoka kwa wachezaji wenzake, makocha, na wafanyikazi, huku Ogam akiibuka mshindi dhidi ya washiriki wenzake wa fainali Shaphan Siwa, Charles Momanyi, na George Kaddu.

"Nimefurahi kupokea tuzo hii. Ina maana kubwa kwangu. Nina deni la mafanikio haya kwa wachezaji wenzangu, kwani nisingeweza kufikia hatua hii bila msaada wao. Makocha pia wamechangia katika maendeleo yangu. Utambuzi huu unanitia moyo kuendelea kufanya kazi kwa bidii na kufunga mabao zaidi.”

Christine Kariuki, Meneja Masoko wa Tusker, alisema ana furaha kujumuika na mafanikio ya timu hiyo.

"Kwa kweli ni furaha kuwa sehemu ya sherehe hii. Hakuna kitu cha kuridhisha zaidi kuliko kujumuika pamoja kusherehekea maendeleo tuliyofikia, na kuwaheshimu wachezaji, wafanyakazi wa kiufundi na wasimamizi kwa bidii na kujitolea kwao."

"Kama KBL, tunasalia kujitolea kikamilifu kusaidia timu kwa kila njia iwezekanavyo-sio tu katika kutambua wachezaji bora, lakini katika kuhakikisha kwamba kila mwanachama wa kikosi hiki anasalia na motisha na kuhamasishwa kufikia uwezo wake kamili," alisema.

Mkurugenzi Mtendaji wa Tusker FC, Sam Nzau alipongeza upande huo kwa kusajili matokeo chanya.

"Kwa bidii, uthabiti, na imani katika Mungu, hakuna kitu ambacho hatuwezi kufikia. Ninataka kumpongeza Ryan kwa kutambuliwa kwake vizuri. Mafanikio yake ni matokeo ya kujitolea kwake, ndani na nje ya uwanja, ambapo nidhamu yake imekuwa ya kupigiwa mfano.”

“Pia ningependa kutoa shukrani zetu kwa wafadhili wetu. Bila msaada wao, mengi ya haya yasingewezekana. Wamechukua jukumu muhimu katika kutoa rasilimali tunazohitaji ili kufanikiwa, "alisema.