logo

NOW ON AIR

Listen in Live

Kyle Walker aiandikia Man City barua ya kihisia huku akijiunga rasmi na AC Milan

Walker amekamilisha uhamisho wa kujiunga na klabu ya AC Milan ya Italia kwa mkopo kwa muda uliosalia wa msimu wa 2024/25.

image
na Samuel Mainajournalist

Football25 January 2025 - 08:38

Muhtasari


  • Dili la Milan kwa Walker linajumuisha chaguo la kumnunua wakati  mkataba wake wa mkopo utakapokamilika mwishoni mwa msimu.
  • Walker atavaa jezi nambari 32 huko Milan, na anaweza kucheza mechi yake ya kwanza watakapoikaribisha Parma katika Serie A Jumapili.


 


Nahodha wa Manchester City Kyle Walker amekamilisha uhamisho wa kujiunga na klabu ya AC Milan ya Italia kwa mkopo kwa muda uliosalia wa msimu wa 2024/25.

Beki huyo wa kimataifa wa Uingereza mwenye umri wa miaka 34 alikamilisha vipimo vya afya na wababe hao wa Serie A siku ya Alhamisi kabla ya kutambulishwa rasmi.

Dili la Milan kwa Walker linajumuisha chaguo la kumnunua mchezaji huyo wa zamani wa Tottenham Hotspurs wakati  mkataba wake wa mkopo utakapokamilika mwishoni mwa msimu.

Walker ambaye ni mshindi mara sita wa Ligi Kuu ya Uingereza akiwa na City, anaungana na Waingereza wenzake Fikayo Tomori, Ruben Loftus-Cheek na Tammy Abraham kwenye uga wa San Siro.

Atavaa jezi nambari 32 huko Milan, na anaweza kucheza mechi yake ya kwanza watakapoikaribisha Parma katika Serie A Jumapili.

Kufuatia uhamisho wake, Walker aliandika barua ndefu na yenye hisia kali kwa wenzake katika City, mashabiki na makocha wa klabu hiyo baada ya kuthibitishwa kuondoka kwake akisema kwamba kusajiliwa kwa klabu hiyo imekuwa ndoto.

"Shukrani kubwa kwa watu wengi, wakufunzi, wahudumu wa vifaa na wafanyikazi wote wa nyuma ambao wanafanya kazi bila kuchoka nyuma ya pazia. Mnafanya kila siku kufurahisha na kutoa jukwaa kwa sisi kufanya bora," Walker aliandika kwenye Instagram.

"Kwa wachezaji wenzangu, tangu nilipopitia mlangoni nilihisi niko nyumbani. Asanteni kwa kumbukumbu nzuri na mafanikio tuliyoshiriki pamoja. Nyinyi ni marafiki, lakini pia familia ya maisha. Kwa Pep Guardiola, asante kwa kuniamini na kufanya kazi kwa bidii kunileta hapa mwaka wa 2017. Pamoja, tumesherehekea makombe 17, na mwongozo wako umenisaidia kuwa mchezaji niliye leo nashukuru,” aliongeza.

Walker ameichezea City mechi 319 tangu uhamisho wa £50m kutoka Tottenham mwaka 2017 na alikuwa sehemu ya timu iliyoshinda mara tatu msimu wa 2022-23.

Beki huyo wa kulia, ambaye ameichezea Uingereza mechi 93, amekuwa sehemu ya vikosi vyote sita vilivyotwaa ubingwa wa Ligi Kuu ya Uingereza chini ya Pep Guardiola kwenye Uwanja wa Etihad.

Walker alicheza mara ya mwisho tarehe 4 Januari dhidi ya West Ham lakini alimfahamisha meneja Guardiola baada ya mchezo kuwa anataka kuondoka klabuni hapo.


RADIO JAMBO FREQUENCIES

Kisumu 100.1 | Mombasa 92.3 | Nakuru 96.9 | Eldoret 99.5 | Nyeri 99.3 | Nyahururu 97.3 | Webuye 95.3 | Meru 92.7 | Kitui 104.9 | Kibwezi 104.7 | Voi 105.7 | Malindi 98.1 | Lamu 104.7 | Narok 97.3 | Kapenguria 99.7 | Kisii 89.3 | Garissa 104.3 | Maralal 97.3 | Lodwar 92.7


logo© Radio Jambo 2024. All rights reserved