Kalonzo kuhojiwa kwa nafasi ya naibu rais hakumdunishi - Sabina Chege

Muhtasari

• Seneta Mutula Kilonzo Junior alisema kuwa haikuwa heshima kumpitisha kiongozi wa chama chake kwa mahojiano ya kutafuta mgombea mwenza wa Raila. 

• Mutula alisema wagombea mwenza wa Raila walifaa kuruhusiwa kujadiliana wao kwa wao ili kupata mwaniaji anayefaa.

• Chege alifichua kuwa kinara huyo wa chama cha Wiper alishiriki katika uteuzi wa baraza la ushauri lililopewa jukumu la kufanya mahojiano hayo. 

Mkuu wa Azimio la Umoja One-Kenya, Kalonzo Musyoka akiwaonyesha wakuu wachache Raila Odinga jambo kwenye simu yake wakati wa mkutano wa kampeni huko Turkana, Aprili 4, 2022.
Kalonzo na Raila Odinga Mkuu wa Azimio la Umoja One-Kenya, Kalonzo Musyoka akiwaonyesha wakuu wachache Raila Odinga jambo kwenye simu yake wakati wa mkutano wa kampeni huko Turkana, Aprili 4, 2022.
Image: TWITTER// RAILA ODINGA

Mwakilishi wa Wakike wa Murang'a Sabina Chege amesema kuwa kumhoji kiongozi wa Wiper Kalonzo Musyoka kuwa mgombea mwenza wa urais sio kumdhalilisha. 

Sabina, ambaye ni mwanachama wa baraza la Azimio la Umoja One Kenya, alitetea hatua ya kuteua jopo la ushauri kufanya mahojiano hayo.

 "Unyenyekevu ni fadhila, tulimwona DP Ruto akienda kwa mahojiano na kujibu maswali ili athibitishwe kuwa mgombea urais wa UDA. Sidhani kama unaweza kusema huo ulikuwa ukosefu wa heshima," Chege alisema. 

Matamshi yake yalionekana kumjibu Naibu Rais William Ruto ambaye Jumatano alisema kumhoji aliyekuwa makamu wa rais ni onyesho la kumdhalilisha kwa upande wa uongozi wa Azimio. 

"Lazima tuungane ili kuondoa utamaduni wa udanganyifu wa kisiasa, sifa za baadhi ya wanasiasa. kila kiongozi anastahili utu na heshima fulani. Heshima si utumwa," Ruto alisema kwenye Twitter. 

Lakini akizungumza kwenye runinga ya NTV siku ya Jumanne, Chege alifichua kuwa kinara huyo wa chama cha Wiper alishiriki katika uteuzi wa baraza la ushauri lililopewa jukumu la kufanya mahojiano hayo. 

Hata hivyo, Seneta wa Makueni Mutula Kilonzo Junior, ambaye alishiriki katika kipindi kimoja cha mazungumzo na Chege, alisema kuwa haikuwa heshima kumpitisha kiongozi wa chama chake kwa mahojiano ya kutafuta mgombea mwenza wa Raila. 

Mutula alisema wagombea mwenza wa Raila walifaa kuruhusiwa kujadiliana wao kwa wao ili kupata mwaniaji anayefaa. 

Mnamo siku ya Jumanne, Katibu Mkuu wa baraza la Umoja One Kenya Alliance, Junet Mohamed, alielezea umuhimu wa mahojiano hayo. 

Alisema mchakato wa kuwapiga msasa wanaotaka nafasi hiyo ulikuwa muhimu kwa madhumuni ya kumchagua mgombea mwenza aliye na uwezo zaidi na anayefaa kuwa naibu wa Raila kabla ya uchaguzi wa Agosti 9.