Patanisho: Jamaa awaongelesha vibaya mkewe na mama mkwe baada ya kula fare ya Sh20,000

Jamaa aliyejitambulisha kama Ramsey Namema ,24, kutoka Mlolongo alituma ujumbe akiomba kupatanishwa na mama mkwe wake Jackline Mokaya ambaye alikosana naye mapema mwaka huu.

Ramsey alisema uhusiano wake na mama mkwe uliharibika Aprili mwaka huu wakati walipozozana baada ya mke wake kuenda nyumbani na kutorudi.

Alisema mkewe alienda nyumbani kwa ajili ya mazishi, ila hakuwahi kurudi licha ya yeye kutuma nauli mara kadhaa.

"Huwa ananiambia anakuja, natuma nauli na hakuji. Wakati nilikuwa nawatumia nauli na hakuji, nilikasirika nikawaongelesha vibaya.. Niliongelesha mama mkwe vibaya," Ramsey alisema.

Aliongeza, "Tuko na mtoto mmoja, tulikuwa tunaishi tu, nilikuwa napanga kuenda kwao mwaka ujao. Tulikuwa tunaongea tu vizuri, nikituma pesa ndo wanaanza madharau. Amekula nauli ya kama 20,000."

Ramsey alisema kwamba wazazi wake tayari wamemuomba kuachana na mkewe ila hataki kwani wana mtoto.

"Nilieleza wazazi, lakini mama mkwe alikataa. Wazazi wananiambia niachana na yeye. Niko na mtoto na yeye, sitaki kumuacha. Hana simu, tunawasiliana kutumia simu ya mama," alisema.

Juhudi za kumpatanisha Ramsey na mama mkwe wake hata hivyo hazikufua dafu kwani simu yake haikuingia alipopigiwa na Gidi.

Ramsey aliendelea kufichua kwamba hajawahi kukutana na mama mkwewe licha ya kuwa tayari ana mtoto na bintiye.

"Tulikutana na yeye akiwa kwa shangazi.Ata sijawahi kukutana na mama yake. Nimempeleka kwetu," alisema.

Katika maneno yake ya mwisho kwa mama mkwewe, Ramsey alisema, "Mama Cynthia, mimi sina ubaya na wewe. Ningependa uambie Cynthia arudi kwake. Sina ubaya. "