Mwili wa mkweaji Cheruiyot Kirui kubaki Mlima Everest, familia yafichua kwa nini
Familia ya marehemu Kirui imefanya uamuzi mgumu wa kuuacha mwili wake ubaki mahali alipofia kwenye Mlima Everest.
•Familia imefichua uamuzi wa kuuacha mwili ubaki mlimani ulifanywa kufuatia mashauriano ya kina na kuzingatiwa kwa kila hali.
•"Cheruiyot alikuwa na mapenzi makubwa kwa milima, na ilimpenda pia.Tunapata faraja kwa kujua anapumzika mahali pake pa furaha," familia ilisema.
Image: HISANI
Familia ya marehemu mpanda mlima wa Kenya Joshua Cheruiyot Kirui imefanya uamuzi mgumu wa kuuacha mwili wake ubaki mahali alipofia kwenye Mlima Everest.
Cheruiyot alifariki Mei 23 alipokuwa akijaribu kukwea kilele cha mlima huo mrefu zaidi duniani bila hewa ya oksijeni ya ziada. Alifariki pamoja na kiongozi wake kwenye safari hiyo, Nawang Sherpa kutoka Nepal.
Familia ya marehemu imefichua kuwa uamuzi wa kuuacha mwili wake ubaki mlimani ulifanywa kufuatia mashauriano ya kina na kuzingatiwa kwa kila hali.
"Cheruiyot alianguka kwenye shimo lililo umbali wa mita 48 kutoka kwenye kilele (mita 8,848) na kurejesha mwili wake kutoka juu itakuwa hatari kwa timu ya uokoaji," familia ya Cheruiyot ilisema katika taarifa iliyotolewa siku ya Jumatano.
Waliongeza, “Familia haitaki kuhatarisha maisha yoyote. Cheruiyot alikuwa na mapenzi makubwa kwa milima, na ilimpenda pia. Tunapata faraja kwa kujua anapumzika mahali pake pa furaha.”
Familia ya marehemu mpanda milima huyo ilitoa shukrani za dhati kwa upendo na sapoti ambayo wamepokea kutoka kote ulimwenguni tangu tukio hilo la bahati mbaya kutokea.
Pia waliifariji familia ya marehemu Nawang Sherpa aliyefariki pamoja na marehemu Cheruiyot.
“Kutakuwa na ibada ya ukumbusho jijini Nairobi na katika kijiji cha Chepterit, taarifa kuhusu hili itawasilishwa kwa wakati ufaao. Usaidizi kwa familia unaweza kutumwa kupitia; Paybill: 522533, Account: 9229224, Name: Cheruiyot Kirui Fundraising,” familia hiyo ilisema.
Siku ya Ijumaa wiki iliyopita, familia ya marehemu Cheruiyot ilieleza masikitiko yao kufuatia kufariki kwa mmoja wao.
Walithibitisha kwamba marehemu pamoja na muongozi wake Nawang Sherpa walipoteza mawasiliano na kambi ya chini kabla ya wote wawili kuanguka.
"Sote tumehuzunishwa na yaliyompata ndugu yetu Cheruiyot Kirui kwenye Mlima Everest," familia ya Cheruiyot ilisema kwenye taarifa.
"Cheruiyot alipoteza mawasiliano ya redio na kambi yake mapema asubuhi ya Mei 22, 2024 katika harakati zake za kukwea hadi kilele. Aliripotiwa kutoweka na mwenzake katika msafara na mara moja timu ya waokoaji waliokuwa kwenye kambi ya 4 walitumwa hadi kufikia hatua ya kuwasiliana mara ya mwisho.
Mwili wake uligunduliwa kwenye mwinuko wa mita 8,800, mita 48 kutoka kwenye kilele. Ingawa haiwezekani kubainisha matukio yaliyojiri kikamilifu, tunajua kwamba Cheruiyot na muongozi wake wa sherpa, Nawang Sherpa, walianguka,” taarifa hiyo ilisoma zaidi.