Hatimaye Raila aweka wazi hatoshiriki mdahalo wa urais, "Siwezi shiriki meza moja na Ruto"
Makau Mutua alifichua kwamba Raila hatoshiriki mdahalo wa urais kwani itakuwa ni kama anamsaidia Ruto kujinadi kwa Wakenya.
• "Sisi tumekubali hatutasaidia kuwezesha kampeni zake kwani Raila kushiriki ni kama njia moja ya kumsaidia Ruto kunadi sera zake" - Makau Mutua
Hatimaye mpeperusha bendera wa muungano wa Azimio la Umoja One Kenya, Raila Odinga ameweka wazi kwamba hatoshiriki kwenye mdahalo wa urais uliokuwa umeratibiwa Jumanne wiki hii kwa kile alisema kwamba hatoweza kushiriki meza moja na mpeperusha bendera wa muungano wa Kenya Kwanza, William Ruto.
Katika taarifa iliyotolewa kwa vyombo vya habari Jumapili, mwakilishi wa kamati ya kampeni za Raila msomi profesa Makau Mutua alisema kwamba William Ruto ambaye alikuwa anatarajiwa kumenyana na Raila kwenye mmdahalo huo hana vigezo vya kugombea na hivyo Raila kushiriki ni kama kujichafulia jina.
“Yatakuwa ni makosa makubwa mno kumzawidi mtu kama huyo kwa mdahalo wa kitaifa. Sisi tumekubali hatutasaidia kuwezesha kampeni zake kwani Raila kushiriki ni kama njia moja ya kumsaidia Ruto kunadi sera zake. Acha ajieleze mwenyewe na sera zake potovu kwa wananchi bila usaidizi wetu,” Makau Mutua alisema.
Taarifa hiyo ilisema kwamba badala ya Raila kuhudhuria mdahalo huo ,ataandaa mkutano wa wananchi katika ukumbi wa kijamii wa Jericho ili kushiri,I na wananchi kuwasikiliza maoni yao. Mkutano huo wake utaoneshwa kwenye runinga.
Raila kususia mdahalo huo inakuja siku chache tu baada ya mgombea urais wa chama cha Roots, wakili msomi George Wajackoyah kusema kwamba hata yeye hatashiriki mdahalo huo kama hawatakuwa meza moja na wagombea wengine watatu, David Mwaure wa Agano, Raila Odinga wa Azimio na William Ruto wa Kenya Kwanza.
Madai ya Raila kulenga kukwepa mdahalo huo yalianza kusemwa na katibu wa mawasiliano katika kamati ya kampeni zake Dennis Onyango ambaye alifokea jinsi mdahalo wa wagombea wenza ulivyoendeshwa na kusema kama ndio hivyo basi watu wasiwe na matumaini makubwa sana kama Raila atashiriki.
Ijumaa wiki jana mbunge wa Suna Mashariki, Junet Mohammed katika mkutano wa kisiasa kwenye kaunti ya Trans Nzoia pia alisema Raila hangeshiriki mdahalo huo kama masuala ya ufisadi, uongozi na uadilifu hayatapewa kipaumbele. Badala yake, alisema muungano huo utamtuma mbunge Babu Owino kumwakilisha Baba.