Mercy Mawia: Mtangazaji Wa Redio Aliyefariki Miezi 4 Iliyopita Aachia Wimbo Mpya

MTANGAZAJI na msanii wa nyimbo za injili za Kikamba, Mercy Mawia aliyefariki mwishoni mwa mwezi Julai ameachia wimbo wake mpya.

Mawia, ambaye alikuwa mtangazaji katika kituo cha redio ya Mbaitu FM inayotangaza kwa lugha ya Kikamba alifariki Julai, na miezi minne baadae, mumewe James Mwangi ameachia wimbo wake wa mwisho.

Mwangi, kupitia ukurasa wake wa Facebook, alifichua kwamba wimbo huo ulikuwa wa mwisho uliorekodiwa na Mercy kabla ya kifo chake.

Mwangi ameachia iwmbo huo siku ambayo ilifaa kuwa siku ya kuzaliwa ya mpenzi wake, Mercy Mawia ambayo ni Novemba 29.

“Katika maisha yake, mwanamume atamlilia mwanamke mmoja tu. Baada ya hapo, hawezi kamwe kuingia katika upendo tena,” Mwangi alisema huku akifichua kuachia wimbo huo.

Mnamo Julai 23, Kituo hicho cha redio kilithibitisha kifo cha mtangazaji huyo na kuongeza kuwa aliaga dunia alipokuwa akifanyiwa upasuaji. Mumewe alikuwa kando yake wakati kwa bahati mbaya aliaga dunia.

"Ni kwa masikitiko makubwa tunatangaza kifo cha ghafla cha mtangazaji wetu wa kipindi cha Drive Show Mercy Mawai. Mercy almaarufu Kamuwetangi, amefariki asubuhi ya leo alipokuwa akipatiwa matibabu," kituo hicho kilitangaza