“Mimi Ni Slim Na Light-Skin” MP Peter Salasya Awajibu Wale Wanaofikiria Yeye Ni Mweusi

MBUNGE wa Mumias Mashariki, Peter Salasya amewajibu wale ambao hawajawahi kutana naye ana kwa ana na ambao wana taswira tofauti ya muonekano wake vichwani mwao.

Kupitia kurasa zake kwenye mitandao ya kijamii, Salasya aliweka wazi kwamba kuna baadhi ya watu ambao hawajawahi kutana naye wanafikiria kwamba yeye ni mtu mweusi na pengine mnene.

Alikanusha madai hayo akisema kwamba yeye ni mweupe kwa ngozi na pia ni mwembamba lakini wakati mwingine kamera humtoa kuonekana mweusi hivyo kuwachanganya watu kuusu muonekano wake halisi.

“Kumbe watu hufikiria mimi ni mu dark skin hehe ni camera tu hunitoa mbaya but am slim and light skin,” Salasya alisema.

Mbunge huyo alikuwa akiwaelezea watu waliokutana naye ghafla baada ya kutua jijini Mombasa kwa ajili ya michezo ya wabunge wa Jumuiya ya Afrika Mombasa iliyoanza Jumamosi.

Watu hao walionyesha furaha na kukutana na Salasya na kueleza jinsi ambavyo wamekuwa wakifikiria muonekano wake.

Mmoja alisema kwamba yeye amekuwa akifikiria Salasya ni mtu mweusi mnene kiasi kumbe ni tofauti na yule aliyemuona.

Mbunge huyo wa DAP-K kwa sasa yuko katika vita vikali na baadhi ya wandani wa chama cha ODM ambapo aliweka wazi lengo lake ni kuhakikisha amemng’oa kiongozi Raila Odinga katika ukanda wa Magharibi kwa kufifisha ushawishi wake.

Salasya alimshtumu Odinga kwa kusaliti Gen Z alipoungana na Ruto wakati Maandamano ya vijana hao yalikuwa yamefika kilele chake kati ya mwezi Juni na Agosti mwaka huu.