“Alinitoa katika madawa, usherati na pombe!” Size 8 akiri huku akiadhimisha wokovu

Mchungaji na mwimbaji wa nyimbo za injili Linet Munyali almaarufu Size 8 Reborn ameonekana kukiri kwamba alikuwa amezama sana katika raha za kidunia kabla ya kuchukua hatua ya kukokoka miaka mingi iliyopita.

Mama huyo wa watoto wawili alitoa maisha yake kwa Yesu Kristo zaidi ya mwongo mmoja uliopita, katika kipindi ambacho alifunga ndoa na mcheza santuri Samuel Muraya almaarufu DJ Mo.

Katika chapisho la hivi majuzi, alionyesha picha zake za kumbukumbu zinazoonyesha alipokuwa angali katika tasnia ya muziki wa kilimwengu na katika sehemu ya maelezo, alisherehekea Mungu kumuondoa mahali hapo.

“Alikonitoa katikati ya madawa, usherati na pombe hiyo ilikua rada,” Size 8 alisema kwenye picha ambazo alichapisha.

Aliongeza, “Utukufu kwa Mungu, kwa rehema na neema zake alituokoa, nimeokoka.”

Size 8, ambaye alianza kama mwanamuziki wa kilimwengu akiachia vibao vilivyomtambulisha kama mmoja wa wasanii mashuhuri wa kike, aliokoka mwaka wa 2012.

Ni mwaka huo huo ambapo alifunga ndoa na DJ Mo ambaye wamezaa naye watoto wawili pamoja.

Baada ya kuokoka, alijipatia jina jipya la Size 8 Reborn na kujitolea sana, ikiwa ni pamoja na kupeana baadhi ya vitu vyake vya thamani alivyokuwa amechuma kutoka kwa ulimwengu wa kilimwengu.

Chapisho la hivi majuzi la mwimbaji huyo linakuja wakati ndoa yake inasemekana kuwa imefikia kikomo.

Mwezi uliopita, Size 8 alifunguka kuhusu uamuzi mzito wa kuvunja ndoa yake na DJ Mo, wiki kadhaa baada ya kufichua kuwa hakuwa na mchumba.

Katika taarifa ya hisia kali, mwimbaji huyo alikiri kwamba licha ya maoni makali ya umma na uvumi mwingi, hisia zake kwa DJ Mo bado ni kubwa.

Hapo awali, alikuwa amewashtua wafuasi wake kwa kutangaza kwamba sasa yupo single, na hivyo kuashiria mwisho wa ndoa yao ya miaka 11.

Tangazo hilo lilikumbwa na mchanganyiko wa mshangao na mashaka, huku wengi wakihoji iwapo kutengana kwao ni kweli au ni taswira ya kiki.