Mahakama yaamuru Kinyonga aliyepewa mafunzo kumroga rais kupelekwa ‘rehab’

KATIKA kesi isiyo ya kawaida, mahakama ya juu nchini Zambia imetoa uamuzi wa kinyonga anayedaiwa kupatiwa mafunzo ya jinsi ya kumroga rais wa taifa hilo, Hachilema Hakainde kupelekwa katika kituo cha kurekebisha tabia.

Kinyonga huyo ni miongoni mwa vitu vingi vya kishirikina vilivyonaswa na washukiwa wawili – waganga wa kienyeji – ambao walikamatwa Desemba 2024 kwa tuhuma za kuroga rais, jarida la Zambain Observer liliripoti.

Washukiwa hao waawili, Leonard Phiri (43) na Jasten Candunde (42) wanakabiliwa na makosa mawili: Kumiliki hirizi na Kukiri ujuzi wa uchawi.

Akitoa ushahidi wake mbele ya Mahakama ya Lusaka, Ofisa wa Idara ya Wanyamapori ya Lilayi, Bright Nkhoma, aliiambia mahakama kuwa kinyonga huyo ni sehemu ya mkusanyo wa hirizi aina ya juju waliokutwa na watuhumiwa hao.

Lakini ilikuwa jukumu la kinyonga katika njama hiyo iliyodaiwa kuwaacha kila mtu katika chumba cha mahakama akiwa ameshtuka na kufurahishwa.

Kulingana na afisa huyo wa idara ya wanyamapori, mnyama huyo alipewa mafunzo ya kubadili rangi kwa njia ambayo "itamchanganya na kumdhoofisha" Rais.

Kufuatia "kukamatwa" kwake, kinyonga huyo alitumwa rehab kwa ajili ya kurekebisha tabia.

Wakati Phiri na Candunde wakisubiri hatima yao mahakamani, kinyonga huyo sasa anasemekana kuzoea maisha, akipokea "huduma" na pengine kutafakari maisha yake mafupi katika ulimwengu wa siasa na uchawi.

Kesi hiyo inapoendelea, Watu wanabaki wakiuliza: Nani alijua hata vinyonga wana taaluma katika uchawi?