Diamond aeleza kwa nini alim'surprise mlinzi wake na zawadi ya gari jipya

Siku ya Jumanne jioni, staa wa bongo fleva Naseeb Abdul Juma almaarufu Diamond Platnumz alimfanyia mlinzi wake Onesmo Amosi jambo la kupendeza kwa kazi nzuri ambayo amekuwa akimfanyia.

Bosi huyo wa WCB alim’surprise Onesmo na gari jipya aina ya Toyota Alphard na akabainisha kuwa hiyo ilikuwa ni ishara ya kumshukuru mlinzi huyo ambaye amekuwa akimfanyia kazi kwa muda.

Diamond alibainisha kuwa mlinzi huyo ni miongoni mwa watu waliomsaidia kufanya vizuri katika kazi yake kubwa ya muziki.

“Onesmo amekuwa mlinzi wangu akinilinda mimi. Licha ya kunilinda amekuwa akinitreat kama mdogo wake. Ata tukisafiri katika nchi yoyote, hanitreat kama mtu baki ama tu eti mimi ananilinda, yaani amenitreat kama mdogo kabisa, yaani kwa hali na mali ama chochote,” Diamond alisema.

Staa huyo wa bongo fleva alithibitisha kuwa Onesmo amekuwa na heshima sana katika kutekeleza majukumu yake.

“Kingine ninachompendea huyo bwana, sio mnokwe, sio mtu wa kutoa siri. Ni mchapa kazi. Nikasema leo nitam’surprise, nimenunua hii Alphard kwa ajili yake,” alisema Diamond huku akimkabidhi mlinzi wake gari hilo.

Bosi huyo wa WCB alibainisha kuwa gari hilo litamsaidia mlinzi wake kubeba familia yake na pia kumsaidia katika kazi zake.

“Nimempa yeye Alphard kwa sababu ninajua ni mtu ana familia. Wakati mwingine anaweza akawa na kazi zake za kiulinzi. Ana kampuni yake pia binafsi ambayo wanahitaji kulindwa, anawapa watumiaji,” alisema.

Onesmo alimshukuru sana bosi wake kwa zawadi hiyo kubwa na akabainisha kuwa hakuwa anajua kwamba angempa gari hilo.

Mwimbaji mkongwe na mshirika wa Diamond Baba Levo alimkabidhi funguo ya gari Onesmo na kumuongoza kuingia ndani na kuizindua.