Mama wa mtoto wa wiki 3 aanguka na kufa kwa njaa Baringo

Mwanamke anayenyonyesha alianguka na kufariki alipokuwa akirejea nyumbani kutoka kwenye bwawa la maji katika kijiji cha Ng’aratuko, kaunti ndogo ya Baringo Kaskazini.

Emily Chebon, 38, alijifungua mtoto wake wa tano wiki tatu zilizopita.

Sababu ya kifo hicho haijajulikana lakini wakaazi wanashuku kuwa huenda ni njaa.

"Alikuwa akisafiri kurudi nyumbani alipoanguka na kufariki papo hapo. Hakuna aliyeweza kueleza sababu mara moja,” mzee Richard Chelal alisema.

Chebon alikuwa miongoni mwa mamia ya waathiriwa wa shambulio la majambazi waliokimbia makazi yao.

Mumewe asiye na kazi Henry Chesut, aliyekuwa Askari wa Akiba wa Kitaifa wa Polisi, hakuwa nyumbani wakati huo.

Alikuwa akishika doria kwenye mipaka yenye vipenyo na wanaume wengine ili kuwaepusha na majambazi.

Eneo hilo linapakana na Tiaty, ambapo kikosi cha maafisa wa usalama kwa sasa kinatekeleza operesheni ya kuwakabili majambazi waliojihami.

Chebon alikuwa amebeba jeri la lita 20 lililojaa maji ya matope na alikuwa amemshika mkono mwanawe wa miaka minne alipofariki saa kumi jioni siku ya Jumatano.

Vilio vya mvulana huyo wakati mama yake alipoanguka ndivyo vilivyovutia umakini wa wanakijiji, ambao walikimbilia kusaidia.

“Hatukuweza kusaidia kwa sababu tulimkuta tayari amelala bila uhai. Tuliwaarifu polisi waliokuja na kusafirisha mwili hadi kwenye chumba cha kuhifadhia maiti,” Chelal alisema.

Kamanda wa polisi wa Baringo Kaskazini Fred Odinga alithibitisha kisa hicho.

Alisema chanzo cha kifo hicho hakijaweza kufahamika mara moja.

Odinga alisema polisi waliupeleka mwili huo katika chumba cha kuhifadhi maiti cha Hospitali ya Baringo Referral kusubiri uchunguzi wa maiti.

Alisema hawajavuna zao lolote katika kipindi cha miaka mitatu iliyopita baada ya mvua kukosa kunyesha.

Pia imekuwa muda mrefu tangu walipopokea chakula chochote kutoka kwa serikali, Chelal aliongeza.

"Kwa kweli tunateseka na tunaogopa kufa kwa njaa, hatujui pa kukimbilia," alisema.

Mkazi Rebbeca Tonje aliwataka wasamaria wema kuingilia kati na kumwokoa mtoto wa marehemu mwenye umri wa wiki tatu.

"Mama mkwe wa marehemu ni mgonjwa na mlemavu hivyo hawezi kumtunza mtoto yatima," alisema.

Tonje alisema familia ya Chebon ni miongoni mwa familia nyingi katika kijiji cha Ng’aratuko ambazo zimefukuzwa na mifugo yao kuibiwa na majambazi.

“Kwa kweli tunakodolea macho umaskini uliokithiri. Tunaiomba serikali kutupatia chakula na kutupatia makazi mapya,” alisema.