Serikali yatoa shilingi bilioni 9 kwa mamlaka ya afya SHA

Serikali kupitia wizara ya afya imetangaza kutoa shilingi bilioni 9 kwa mamlaka ya afya SHA, katika harakati ya kulipa madeni yanayodaiwa na hospitali baada ya kutoa huduma chini ya bima ya kitaifa ya afya iliyotolewa NHIF.

Katibu katika wizara hiyo Harry Kimtai ametangaza kutolewa kwa fedha hizo mapema Jumanne akiwa katika kaunti ya Nakuru wakati wa ufunguzi wa kamati ya sekta mbali mbali katika jimbo ya bonde la ufa.

Kimtai amesema kuwa fedha hizo zitasambazwa kwa hospitali kufikia mwisho wa wiki hii ikiwemo shilingi bilioni moja iliyotolewa kwa wakfu wa Linda Mama kuwasaidia wanawake wajawazito kujifungua katika hospitali bila malipo.

Katibu huyo pia amesisitiza haja ya wizara kutoa malipo kwa hospitali kwa wakati unaostahili ili wagonjwa wanaotafuta huduma za afya katika hospitali mbali mbali wapate huduma hiyo bila ya kufukuzwa wala kutoa fedha mfukoni ili kutibiwa.

Wizara ya afya imetia sahihi kwa mikataba 26 na baraza la magavana kuboresha vifaa vya matibabu katika hospitali za umma pamoja na kuwatuma nyanjani maafisa 70 wa kiufundi katika vituo vya afya vya kaunti.

Mkutano wa Nakuru umewaleta pamoja maafisa wa kamati tendaji za kaunti CEC kutoka kaunti za Nakuru, Uasin Gishu, West Pokot, Bomet, Kericho, Nandi, Narok, Baringo, Samburu, Turkana, Laikipia na Nyandarua.

Kamati iliyozinduliwa imetwikwa jukumu la usajili wa wananchi katika mamlaka mpya ya afya nchini SHA.

Katibu Harry Kimtai aidha amezitaka serikali za kaunti kueneza injili ya SHA kwa wakaazi wa maeneo yao ili kuwezesha hatua za serikali kuu kuafikia utoaji wa afya kwa kila mmoja.