Wabunge Wapanga Kuwasilisha Hoja ya Kumuondoa Murkomen Afisini

Wabunge wanaoegemea Chama cha Democracy for Citizens Party (DCP) wamefichua mipango ya kuwasilisha hoja ya kumng’oa afisini Waziri wa Usalama wa Ndani Kipchumba Murkomen.

Hii inajiri baada ya Murkomen kutoa agizo kwa polisi kuwapiga risasi waandamanaji wanaoshambulia vituo vya polisi.

Wabunge hao walisema kuwa agizo hilo tata ni msingi tosha wa kumwondoa Waziri huyo kazini.

Anayeongoza msukumo huo ni Mbunge wa Manyatta Gitonga Mukunji, ambaye alitangaza hayo wakati wa ibada na harambee kwa waumini wa Akurino iliyofanyika katika uwanja wa Chuo Kikuu cha Embu siku ya Jumamosi.

Mukunji alimtuhumu Waziri Murkomen kwa kuendeleza mauaji ya kiholela na visa vya kutoweka kwa watu kwa njia zisizoeleweka, akidai kuwa matukio kama hayo yamekuwa nembo ya utawala wa Kenya Kwanza. Aliitaka Bunge kutekeleza jukumu lake la usimamizi na kulinda maisha na uhuru wa Wakenya.

“Bunge hili lazima lisimame imara. Waziri wa Usalama wa Ndani amevuka mipaka yake kwa kutoa maagizo yasiyo ya kikatiba ambayo yanahatarisha maisha. Hatuwezi kukaa kimya na kutazama,” alisema Mukunji.

Licha ya msimamo wake wa wazi, Mukunji alikiri kuwa hoja hiyo itakumbana na upinzani mkubwa bungeni, akitaja ushawishi mkubwa wa serikali kuu na udhibiti wake kwa wabunge wengi.

“Tuambiane ukweli, Bunge limevamiwa. Lakini lazima tujaribu,” aliongeza.

Mbunge wa Mukurweini John Kaguchia alimuunga mkono Mukunji, akisema kuwa Murkomen alikiuka mamlaka yake ya kisheria.

“Waziri hana mamlaka ya kuamuru polisi wapige na kuua. Maagizo kama haya yanakiuka Katiba na yanapaswa kulaaniwa,” alisema Kaguchia.

Wabunge hao pia walidai kuwa vurugu zilizoshuhudiwa wakati wa maandamano ya Jumatano iliyopita zilipangwa na serikali kwa nia ya kuwaonyesha vijana kama wahalifu na kuhalalisha ukandamizaji.

Murkomen amekumbwa na upinzani mkali kutokana na agizo lake wiki iliyopita kufuatia uharibifu mkubwa ulioshuhudiwa wakati wa maandamano ya kumbukumbu ya Juni 25, ambayo yalihusishwa na wahuni waliodaiwa kulipwa na watu wasiojulikana.

“Mtu yeyote atakaribia police station piga yeye risasi… Mtu mwenye anaenda kuiba bunduki, abembelezwe? Bunduki siyo mandazi,” Murkomen aliwaambia polisi.

Makamu wa Rais wa zamani Rigathi Gachagua, ambaye pia ni kiongozi wa DCP, alimtaja Murkomen kuwa “waziri kijana aliyepagawa kwa pesa na mamlaka,” akimlaumu kwa kutoa matamshi haramu na ya kiholela ambayo yanaweza kusababisha vifo vya watu wasio na hatia na madhara ya kisheria kwa maafisa wa polisi.

Akikabiliana na wimbi la ukosoaji, Murkomen alijaribu kufafanua msimamo wake, akisisitiza kuwa maneno yake yalichukuliwa nje ya muktadha.

Kupitia taarifa yake siku ya Jumamosi, Waziri wa Usalama wa Ndani alisema kuwa kauli zake ziliambatana na Sehemu ya B(1) ya Sheria ya Huduma ya Kitaifa ya Polisi, ambayo inaruhusu maafisa kutumia silaha kujilinda au kuwalinda wengine dhidi ya tishio la karibu la kifo au majeraha makubwa.